ԵՐԵՎԱՆ, 22 ապրիլի — Sputnik. «Ժողովուրդների դեմոկրատական» կուսակցության հայազգի պատգամավոր Կարո Փայլանը հանդես է եկել նախաձեռնությամբ, պահանջել է ձևավորել խորհրդարանական հանձնաժողով և քննել 1908-1915թթ. Օսմանյան կայսրության խորհրդարանի հայազգի 7 պատգամավորների (Գրիգոր Զոհրապ, Պետրոս Հալաջյան, Նազարեթ Տաղավարյան, Կարապետ Փաշայան, Հովհաննես Սերենկիուլյան, Օնիկ Դերձակյան, Համբարձում Բոյաջյան) ձերբակալության և սպանության գործերը, գտնել նրանց մարմինները և հուղարկավորել պատշաճ կարգով։ Այս մասին տեղեկացնում է Bianet.org-ը։
Փայլանը Թուրքիայի Ազգային մեծ ժողովին ողջունել է հայերեն՝ «Բարև ձեզ»։
Ելույթի ընթացքում Փայլանը քննադատել է հայազգի պատգամավորների ձերբակալություններն ու սպանությունները, հիշատակել Հայոց ցեղասպանության կազմակերպիչներ Թալեաթին, Էնվերին, Ջեմալին և մյուսներին։
Փայլանը տարօրինակ է համարել, որ Թուրքիայի բազմաթիվ քաղաքներում փողոցներ են անվանվում Հայոց ցեղասպանության կազմակերպիչ ոճրագործների անուններով.
«Կարո՞ղ եք պատկերացնել՝ դուք գնում եք Գերմանիա և քայլում Հիտլերի անվան պողոտաներով»։ Իր ելույթի վերջում Փայլանն ասել է, որ Թուրքիան պարտավոր է առերեսվել իր պատմությանը և ցուցադրել է Օսմանյան կայսրության հայազգի պատգամավորների անուն ազգանունն ու դիմանկարները։
Փայլանն իր ելույթն ավարտել է այսպես. «Աստված նրանց հոգին լուսավորի»։
