ԵՐԵՎԱՆ, 21 ապրիլի — Sputnik. Բարսելոնայից համակարգչային ինժեներ Դիեգո Բուենդիան (Diego Buendia) Twitter-ում հրապարակել է Սերվանտեսի գրեթե ամբողջ «Դոն Կիխոտ» վեպը։ Դրա համար նա տեքստը մասնատել է ավելի քան 17 հազար փոքր գրառումների, հայտնում է Phys.org-ը։
Թոշակի անցած 55-ամյա իսպանացին ալգորիթմ է ստեղծել, որը ստեղծագործությունը բաժանել է մինչև 140 սիմվոլներից բաղկացած մասերի։ Նա օրական 28 գրառում է հրապարակել առանձին էջում։ Բուենդիայի Twitter-ի էջին ավելի քան 8 հազար մարդ է գրանցվել, այդ թվում` Իսպանիայի վարչապետ Մարիանո Ռախոյը։
Բուենդիան վերջին թվիթը մտադիր է տեղադրել ապրիլի 22-ին` Սերվանտեսի մահվան 400-ամյակի կապակցությամբ։
«Դոն Կիխոտ» վեպը երկու հատորով է հրատարակվել։ Առաջին հատորը լույս է տեսել 1605 թվականին, երկրորդը` 1615-ին։ Ստեղծագործությունը թարգմանվել է աշխարհի բոլոր հիմնական լեզուներով, ստեղծագործության հիման վրա ներկայացումներ և մյուզիքլներ են բեմադրվել, նկարահանվել է ավելի քան 50 ֆիլմ և սերիալ։
