ԵՐԵՎԱՆ, 21 ապրիլի — Sputnik. Կառավարության նիստից հետո լրագրողների հետ զրույցում Շավարշ Քոչարյանը նշեց, որ Հայաստանը չի կարող անտեսել այն ագրեսիան, որն իրականացրեց Ադրբեջանը` խախտելով եռակողմ համաձայնագիրը։
«Մենք գործ ունենք մի սուբյեկտի հետ, որն իր իսկ միջազգային պարտավորությանը հակառակ, եռակողմ համաձայնագրի միջազգային պարտավորությունները կարող է խախտել, հետևաբար ապագայում նա կարող է հետ կանգնել իր իսկ ստորագրությունից։ Այս ամենը պետք է հստակ հաշվի առնել, երբ խոսքը վերաբերում է կարգավորման գործընթացին»,-աաց Շավարշ Քոչարյանը։
Շավարշ Քոչարյանն ամփոփեց` այս հարցում Հայաստանը հետևողական է լինելու։
«Այն, ինչ առաջարկել են համանախագահները, իհարկե հայկական կողմի երազանքը չի եղել, բայց հիմքում ընկած են փոխզիջումային տարբերակներ: Տեսեք՝ կա այսպես ասած՝ հետաձգված հանրաքվեի գաղափարը: Իհարկե, տարօրինակ էր, երբ արդեն եղել է հանրաքվե, ու Լեռնային Ղարաբաղի ժողովուրդը, լիովին համապատասխան և միջազգային իրավունքի, և այն ժամանակ գործող Խորհրդային Միության Սահմանադրությանը, օրենքներին կազմակերպել է հանրաքվեն, իր կամարտահայտությունը հստակ արտահայտել է: Ո՞րն է հետաձգված հանրաքվեի իմաստը: Ըստ միջնորդների՝ դա ուղղված է նրան, որ, այդպես ասած՝ Բաքվի իշխանությունները կարողանան փրկել իրենց դեմքը և ժամանակ ունենան դա մատուցել, հրամցնել իրենց ժողովրդին դրա անհրաժեշտությունը, որովհետև հանրաքվեի արդյունքը, ելնելով այն պայմաններից, որոնք նախապես համաձայնեցված են, գրեթե հասկանալի էր, կանխատեսելի էր»,– ասաց Քոչարյանը:
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին պայմանավորվածություն է ձեռք բերվել ռազմական գործողությունները դադարեցնելու մասին, սակայն երկու կողմն էլ հայտարարում է, որ փոխադարձ պայմանավորվածությունը խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
