ԵՐԵՎԱՆ, 21 ապրիլի — Sputnik. «Հանուն օրենքի» նախաձեռնության անդամ Արման Ղուկասյանը հայտնեց, որ որոշ ժամանակ առաջ Հայաստանում ադրբեջանական սխտոր է հայտնաբերվել։ Սա բավական չէր, հիմա էլ մեծ թվով թուրքական ապրանքներ են ներմուծվում ու տարածում գտնում։ Հասարակության մեծ մասի դիտարկմամբ` թուրքական ապրանքները էժան են ու որակով։ Մինչդեռ դա պարզագույն մարքեթինգային խորամանկություն է։ Իրականում հայաստանյան արտադրանքն ավելի որակյալ է։ Միայն թե մեծ մասսայականություն չի վայելում, քանի որ հարկերն են «խեղդում»։
«Պետք է զարգացնենք մեր տեղական արտադրանքը։ Թուրքականից հրաժարվելուց հետո կարող ենք ներկրել ԵՏՄ շուկաներից»,- ասաց Արման Ղուկասյանը։
Նախաձեռնության անդամ Վարդան Վարդանյանն էլ ընդգծեց` եթե ուզում ենք ինքնասիրությունը պահպանել, ապա պետք է օրենսդրական փոփոխություններ արվեն ու գոնե մի քնի տարով մանր ու միջին բիզնեսին ազատեն հարկերից։
«Միայն հարկերից ազատելով կարելի է էժան արտադրանք ստեղծել։ Լավագույն օրինակներից է Դուբայը։ Այնտեղ հաստոցները 24 ժամ շարունակ աշխատում են ու էժան արտադրանք թողարկում։ Դրա համար էլ աշխարհի տարբեր երկրներից այնտեղ են հասնում առևտրի համար»,-ասաց նա։
Կառավարության շենքի դիմաց բողոքի ձայն բարձրացրած քաղաքացիները թուրքական ծագման որոշ արտադրատեսակներ ցուցադրաբար պատռեցին ու նետեցին աղբամանը։
