ԵՐԵՎԱՆ, 20 ապրիլի- Sputnik. Մի քանի օր առաջ փակվեց Sputnik Թուրքիան, երկրի իշխանությունն էլ արգելեց Sputnik Թուրքիայի գլխավոր խմբագրին մուտք գործել Թուրքիա։ Իրավիճակը մեկնաբանել է «Շանթ» հեռուստաընկերության քաղաքական մեկնաբան Արտյոմ Երկանյանը։
Երկրի կառավարությանը տհաճություն պատճառող թերթերի ու կայքերի փակումը, ինչպես նաև առանձին լրագրողների նկատմամբ բացահայտ քաղաքական հետապնդումները հաստատում են, որ երկրում սահմանափակվում է խոսքի ազատությունը։
Փորձագետի խոսքով` Sputnik Թուրքիա տեղեկատվական գործակալության գլխավոր խմբագիր Թուրալ Քերիմովի անօրինական արտաքսումը լիովին տեղավորվում է այն հակաժողովրդավարական քաղաքականության շրջանակում, որը պաշտոնական Անկարան վարում է իր կողմից չվերահսկվող ԶԼՄ-ների նկատմամբ։
«Անցանկալի լրագրողի նկատմամբ ճնշումներ գործադրելու պատճառը պայմանավորված չէ միայն այն հանգամանքով, որ Sputnik Թուրքիան երկրում կատարվող իրադարձությունները լուսաբանել է Մոսկվայի դիրքորոշումից ելնելով և տեղեկատվական հոսք է ապահովել Անկարայի համար անբարեհաճ լույսի ներքո։ Խնդիրն ավելի լայն է»,- կարծում է Երկանյանը։
Փորձագետի խոսքով` Էրդողանի վարչակազմը խոչընդոտներ է ստեղծում անկախ ԶԼՄ-ների ազատ գործունեության համար։ Վերլուծաբանը նշում է, որ ամեն ինչից զատ, Անկարան թուրքական թերթերից շատերի խմբագրական քաղաքականության վրա ազդելու փորձեր է ձեռնարկում։ Թուրքիայի իշխանությունների գործողություններին պատաշաճ գնահատական է տվել Եվրախորհրդարանը։ Խոսքի ազատության հարցում Թուրքիայի ակնհայտ հետընթացն արտացոլվել է այն բանաձևում, որը Եվրախորհրդարանն ընդունեց անցած շաբաթ։
«Դրա հետ կապված`բավական խոսուն է նաև «Լրագրողներ առանց սահմանների» իրավապաշտպան կազմակերպության գնահատականը Թուրքիային։ Ամենամյա «Մամուլի ազատության ցուցիչի» համաձայն` Թուրքիան իջել է մինչև 151-րդ հորիզոնական` Հայաստանից 77 կետով ցածր։
Երկանյանը նշում է, որ Հայաստանը վարկանիշում առաջ է անցնում այնպիսի առաջատար երկրներից, ինչպիսին է, օրինակ, Իտալիան, իսկ Թուրքիան զիջում է այնպիսի երկրներին, ինչպիսիք են Ռուսաստանը և նույնիսկ Ադրբեջանը։
