ԵՐԵՎԱՆ, 20 ապրիլի — Sputnik. Լիբանանի բանակի գեներալ Նազո Գաբրիելյանը արձագանքել է Կոմանդոսի կոչին և հայտնել, որ դժբախտաբար դրսում ապրող գեներալները տեսականորեն են ծանոթ այն ամենին, ինչ տեղի է ունենում Արցախում։ Այս մասին գրում է «Արևելքը»։
«Տեղում մենք գործնականորեն ծանոթ չենք, մանավանդ գյուղական, դաշտային դիրքերին: Պետք է նախ ծանոթանանք, ուսումնասիրենք»,- ասել է Նազո Գաբրիելյանը։
Նրա կարծիքով` Հայաստանն, անշուշտ, օգնության կարիք ունի նաև ռազմական ոլորտում, թերևս պետք է ռուսական մարտավարությունը համադրել ամերիկյանի հետ և ավելի մեծ հաջողությունների հասնել:
«Ես տիրապետում եմ ամերիկյան մարտավարական սկզբունքներին, միշտ առաջնագծում եմ եղել, միշտ հաջողություններ ենք ունեցել, մեր փորձառությունն էլ անպայման պետք կգա Հայաստանին: Իբրև հայ զինվորական, հայ ժողովրդի հետ եմ, արյանս մեջ է հայությունը, չնայած միշտ օտար պատերազմների եմ մասնակցել, հինգ անգամ էլ վիրավորվել եմ»,- ասել է Լիբանանի բանակի գեներալը:
Նա նշել է, որ արդեն մեկ ամիս է` պաշտոնաթող է եղել, և ճիշտ ժամանակն է հայրենիքին օգնելու:
«Կոնկրետ Լիբանանում արդեն երեք պաշտոնաթող գեներալ կա, որոնք կարող են գալ Հայաստան, մյուսները ծառայում են դեռ: Ինքս անձամբ պատիվ ունեմ Հայաստանի և Արցախի համար»:,- ասել է Նազո Գաբրիելյանը։
Հիշեցնենք, որ գեներալ-մայոր Արկադի Տեր-Թադևոսյանը կոչ էր արել աշխարհասփյուռ հայ գեներալներին և ռազմական փորձագետներին հավաքվել Երևանում՝ հայության առաջ ծառացած խնդիրների լուծումներն ու համահայկական բանակի ուղիները գտնելու նպատակով։
