ԵՐԵՎԱՆ, 19 ապրիլի — Sputnik. Հայաստանի և Ռուսաստանի շրջանների միջև տնտեսական համագործակցության հաջող զարգացման համար անհրաժեշտ են ավելի կոնկրետ գաղափարներ և ծրագրեր, զարգացման համար ներուժ կա, հայտնեց Հայաստանի տարածքային կառավարման և զարգացման նախարարի առաջին տեղակալ Վաչե Տերտերյանը:
«Հայ-ռուսական համագործակցությունը մեծ ներուժ ունի», — ասաց Տերտերյանը ՌԴ և Հայաստանի միջև տնտեսական համագործակցության միջկառավարական հանձնաժողովի միջտարածաշրջանային համագործակցության հարցերով հայ-ռուսական աշխատանքային խմբի նիստի ժամանակ:
Նրա խոսքով` «գիտական միտքը, տեխնոլոգիաները զարգանում են, և այդ առումով Հայաստանը նույնպես կարող է ոչ դատարկաձեռն գալ այդ երկխոսությանը և ներկայացնել իրեն»:
Տերտերյանը նշեց, որ «համագործակցությունը պետք է հստակեցվի և հարստացվի կոնկրետ ծրագրերով»:
«Մենք հաջորդ համաժողովին պետք է արդեն ներկայանանք կոնկրետ գաղափարներով և ծրագրերով», — ավելացրեց Տերտերյանը` նշելով, որ դա ավելի շատ ուղղված է հայ գործընկերներին:
Տերտերյանը նշեց, որ Հայաստանի մի շարք մարզերի ներկայացուցիչներ նախատեսում են համագործակցության ամրապնդման նպատակով աշխատանքային այցով լինել ՌԴ-ում:
«Մեր գործընկերները պայմանավորվել են, որ մարզերի մեր երեք ներկայացուցիչներ կլինեն Ռուսաստանի շրջաններում։ Մինչ օրս դա մեզ չէր հաջողվում: Մենք ակտիվորեն զբաղվում ենք դրանով, համարենք, որ դեռ ուշ չէ», — ասաց Տերտերյանը` նշելով, որ նման հանդիպումներ օբյեկտիվ պատճառներով տեղի չունեցան մարտ և ապրիլ ամիսներին:
