ԵՐԵՎԱՆ, 19 ապրիլի — Sputnik. Հրդեհը բռնկվել էր գեներատորը գործարկելու ժամանակ առաջացած կարճ միացման պատճառով, Sputnik Արմենիային ասաց հյուրանոցի կառավարիչ Սարգիս Ղազարյանը:
«Տանիքում բռնկվեց պահուստային գեներատորը, որը մենք գործարկում ենք հոսանքազրկման ժամանակ: Հավանաբար հրդեհի պատճառը կարճ միացումն էր: Տուժածներ չկան, վնասվել է գեներատորն ու 4-5 մետր մալուխ», — ասաց Ղազարյանը:
Կառավարիչի խոսքով` ուժեղ ծխահարությունն առաջացել է կրակմարիչի օգնությամբ սեփական ուժերով հրդեհը մարելու հետևանքով:
Ղազարյանը հայտնեց, որ ԱԻՆ աշխատակիցներն օպերատիվ են գործել, և նրանց ժամանումից հետո կրակը մարվել է 5-6 րոպեի ընթացքում:
Նրա խոսքով` հյուրանոցի անձնակազմը խուճապի չի մատնվել և գործել է տարհանման պլանին համապատասխան: Հյուրանոցի հյուրերն անհարմարություն չեն զգում, քանի որ այրման մակերեսը հեռու է գտնվում նրանց կացարաններից:
«Ասելու բան չկա», — ասաց նրանցից մեկը:
Հրդեհի հետևանքով հասցված վնասի հստակ չափը պարզվում է:
Հոսանքի մատակարարումը վերականգնվել է: Հյուրանոցները, գրասենյակային տարածքները, բնակելի շենքերը և առևտրային ենթակառուցվածքների օբյեկտները, որոնք գտնվում են վթարի և հրդեհի գոտում, աշխատում են սովորական ռեժիմով:
