ԵՐԵՎԱՆ, 19 ապրիլի — Sputnik. ՌԴ ԱԳՆ ղեկավար Սերգեյ Լավրովն ապրիլի վերջին Երևան իր այցի շրջանակում բանակցություններ կունենա Հայաստանի նախագահ Սերժ Սարգսյանի, ինչպես նաև իր հայ գործընկեր Էդվարդ Նալբանդյանի հետ, ասվում է Ռուսաստանի արտգործնախարարության հաղորդագրության մեջ:
ՌԴ արտգործնախարար Սերգեյ Լավրովն ապրիլի 21-22-ը պաշտոնական այցով կլինի Հայաստանում:
Այցի շրջանակում նախատեսվում է հանդիպում Հայաստանի նախագահ Սերժ Սարգսյանի հետ, կլինեն նաև բանակցություններ Հայաստանի արտգործնախարար Էդվարդ Նալբանդյանի հետ: Նախատեսվում է նաև այցելություն Ծիծեռնակաբերդ:
Հայ գործընկերների հետ բանակցությունների ժամանակ կքննարկվի երկկողմ, տարածաշրջանային և միջազգային օրակարգի հարցերի լայն շրջանակ:
«Հատուկ ուշադրություն կդարձվի Լեռնային Ղարաբաղի հակամարտության կարգավորման խնդրին` հակամարտության գոտում վերջին իրադարձությունները հաշվի առնելով», — ասվում է փաստաթղթում:
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին պայմանավորվածություն է ձեռք բերվել ռազմական գործողությունները դադարեցնելու մասին, սակայն երկու կողմն էլ հայտարարում է, որ փոխադարձ պայմանավորվածությունը խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
