ԵՐԵՎԱՆ, 19 ապրիլի — Sputnik. Երևանի կենտրոնում գտնվող «Նացիոնալ» հյուրանոցում հրդեհ է բռնկվել: Ուժեղ ծխահարությունը զգացվել է նաև մոտակա ողջ տարածքում:
Հրշեջ մեքենաների` դեպքի վայր ժամանելուց մոտ կես ժամ առաջ հյուրանոցին մոտ գտնվող շենքերը հոսանքազրկվել էին: Նույն շենքում է գտնվում նաև Sputnik Արմենիայի գրասենյակը:
Դեպքի վայր է ժամանել վեց մարտական հաշվարկ: Տեղում աշխատում են փրկարարները, ոստիկանությունը և շտապ օգնությունը:
Ինչպես Sputnik Արմենիային հայտնեց հյուրանոցի կառավարիչ Սարգիս Ղազարյանը, հրդեհը բռնկվել է գեներատորի անսարքության պատճառով, հրդեհը տեղային է:
Գեներատորն այրվել է, երբ շենքի հոսանքազրկումից հետո փորձել են այն գործարկել որպես հոսանքի լրացուցիչ աղբյուր:
