ԵՐԵՎԱՆ, 18 ապրիլի — Sputnik. ԱԺ պատգամավոր Արագած Ախոյանը հարցին մոտեցավ մի քանի տեսանկյունից։ Նա միաժամանակ համոզված է, որ Ռուսաստանն իսկապես Հայաստանի դաշնակիցն է։
Նա ասաց, որ ինքն էլ է լսել այն պնդումները, որ եթե Ադրբեջանը զենք չգներ Ռուսաստանից, ապա կգներ ուրիշ տեղից։ Նրա խոսքով` Ադրբեջանին զենք վաճառելու փաստը չպետք է առիթ դառնա, որ Հայաստանի ամենահուսալի գործընկերոջ հետ հարաբերություններում որևէ բան կասկածի տակ դրվի։
«Այստեղ էլ կարելի է որոշ դրական պահեր տեսնել. գոնե վերահսկողության տակ են այդ վաճառված զենքերը։ Ռուսաստանը տեղյակ է, թե ինչ է տրամադրել, և կարող է դրանք վերահսկողության տակ պահել։ Եթե դա տրամադրեր ԱՄՆ-ն կամ Իսրայելը, ինչպես թռչող սարքերի դեպքում, հսկողությունը ավելի դժվար կլիներ»,- կարծիք հայտնեց Ախոյանը։
«Բայց ռուսներն էլ պետք է հասկանան, որ երբ սկսվեցին այս հակասությունները` կապված Թուրքիայի կողմից ռուսական ինքնաթիռի խոցման հետ, Ադրբեջանը միակ երկիրն էր, որ հստակ իր դիրքորոշումն արտահայտեց, ցույց տվեց իր բացահայտ կողմնակից լինելը Թուրքիային»,- նշեց նա։
Եվ այստեղ, նրա խոսքով, ռուսական կողմը պետք է հետևություններ անի։ «Սա մեծ քաղաքականություն է»,- ամփոփեց Ախոյանը։
