ԵՐԵՎԱՆ, 18 ապրիլի- Sputnik. Եվրոպայի խորհրդի խորհրդարանական վեհաժողովի նախագահ Պեդրո Ագրամունտի հայտարարությունները հակասում են միջազգային հանրության դիրքորոշմանը, ասել է Ազգային ժողովի պատգամավոր և հայկական պատվիրակության անդամ Սամվել Ֆարմանյանը։
Ագրամունտը հայտարարել էր, որ 47 անդամ երկրների տարածքային ամբողջականությունը պետք է հաշվի առնել։ Նա նշել էր, որ երկու կողմերը պետք է թուլացնեն լարվածությունը և վերջ տան բռնությանը։
«Մենք չենք կարող անտեսել վեհաժողովի մշտական մարմինների սխալներն այս ողբերգության ժամանակ։ Հակամարտության թեժացման պահից ի վեր Ադրբեջանի ղեկավարությունը հստակ ազդանշաններ է ստացել այն մասին, որ հակամարտության խաղաղ կարգավորումն այլընտրանք չունի, որ պատերազմը տարբերակ չէ։ Ֆրանսիայի, ԱՄՆ-ի, Ռուսաստանի նախագահները, տասնյակ երկրների ղեկավարներ և հարյուրավոր ԱԳՆ-եր, ՄԱԿ-ի գլխավոր քարտուղարը, ԵԱՀԿ-ն, Եվրոպայի խորհուրդը, ԵՄ բարձրաստիճան ներկայացուցիչները, տասնյակ այլ միջազգային կազմակերպություններ հանդես են եկել Ադրբեջանի նախագահ Ալիևի հասցեին ոչ երկիմաստ հայտարարություններով, այն է` դադարեցնել ռազմական ագրեսիան»,- ասել է Ֆարմանյանը։
Նրա խոսքով` թեև այդ հայտարարությունները խաղաղության հույս են տվել, ԵԽԽՎ նախագահ Ագրամունտի անպատասխանատու հռետորությունը հակասություն է մտցրել մեր վեհաժողովի և միջազգային հանրության դիրքորոշման միջև ոչ միայն մարդու իրավունքների ոտնահարումների մասին չիմացությամբ, այլև բացահայտ վտանգավոր ձևակերպումներով, նա բացահայտորեն անցել է Ադրբեջանի կողմն այս անկայուն իրավիճակում։
«Դժբախտաբար, պարոն Ագրամունտի հայտարարությունը կրկին հարցականի տակ է դրել նրա անաչառությունը` որպես վեհաժողովի նախագահի։ Նրա հեղինակությունը լրջորեն տուժում է միլիոնավոր եվրոպացիների և ժողովրդավարական հասարակության անդամների աչքում»,- ասել է Ֆարմանյանը։
Նա նշել է, որ կազմակերպության արժեքները կոշտ և ցինիկ հարձակման ենթարկվեցին սկզբից Եվրոպայի սրտում` Բրյուսելում տեղի ունեցած արյունալի ահաբեկչություններով, իսկ հետո Եվրոպայի հարավ-արևելքում` Լեռնային Ղարաբաղում, որտեղ Ադրբեջանը լայնածավալ ռազմական ագրեսիա սկսեց Ղարաբաղի ժողովրդի դեմ։
Ագրամունտին ուղղված քննադատությամբ է հանդես եկել նաև հայկական պատվիրակության մեկ այլ ներկայացուցիչ` Նաիրա Զոհրաբյանը։ Նրա խոսքով` այն, որ ԵԽԽՎ գործող նախագահն Ադրբեջանի նախագահ Իլհամ Ալիևի մամուլի քարտուղարն է, գաղտնիք չէ։
Իր հերթին խորհրդարանի փոխխոսնակ Հերմինե Նաղդալյանը նշել է, որ Իսլամական պետությունը կորցնում է իր ուժը Սիրիայում և միանգամայն հնարավոր է, որ կփորձի ապակայունացնել իրավիճակը Հարավային Կովկասում։
«Ապրիլի 2-ին Ադրբեջանը հարձակվեց Լեռնային Ղարաբաղի վրա։ Շատ ԶԼՄ-ներ հաղորդել են, որ ադրբեջանական բանակի կազմում կռվում են ԻՊ գրոհայիններ։ Միգուցե հենց նրանց առկայությունը կարող է բացատրել այն բարբարոսական գործողությունները, որոնք իրականացվել են ադրբեջանցիների կողմից 4 օրվա ընթացքում»,- ասել է Նաղդալյանը։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին պայմանավորվածություն է ձեռք բերվել ռազմական գործողությունները դադարեցնելու մասին, սակայն երկու կողմն էլ հայտարարում է, որ փոխադարձ պայմանավորվածությունը խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
