ԵՐԵՎԱՆ, 18 ապրիլի — Sputnik. Հայկական կողմը ԵԱՀԿ Մինսկի խմբի համանախագահների հետ չի քննարկել Լեռնային Ղարաբաղի հակամարտության կարգավորման հարցով բարձր մակարդակի հանդիպման հնարավորությունն ու ժամկետները, ՌԻԱ Նովոստիի հետ զրույցում հայտարարեց ՀՀ նախագահի մամուլի քարտուղար Վլադիմիր Հակոբյանը:
«Այս փուլում բանակցային գործընթացի կողմերը և Մինսկի խմբի համանախագահները չեն քննարկել բարձր մակարդակով հանդիպման հնարավորությունն ու ժամկետները»,-ասաց Հակոբյանը:
Նա նշեց, որ Ռուսաստանի, ԱՄՆ-ի և Ֆրանսիայի նախագահները` որպես ԵԱՀԿ Մինսկի խմբի համանախագահող երկրների ղեկավարներ, բազմիցս հայտարարել են, որ Լեռնային Ղարաբաղի հակամարտության բացառապես խաղաղ կարգավորմանն այլընտրանք չկա, և ուժի կամ ուժի սպառնալիքի բացառումը պետք է լինի հիմնախնդրի լուծման հիմնական սկզբունքներից մեկը:
«Հայաստանը, ինչպես նաև Լեռնային Ղարաբաղը, մշտապես արտահայտել են իրենց աջակցությունը համանախագահների այդ դիրքորոշմանը»,-նշեց Վլադիմիր Հակոբյանը:
«Այն լավ առիթ կլինի` շարունակելու ապրիլի սկզբին Լեռնային Ղարաբաղի դեմ Ադրբեջանի սանձազերծած լայնամասշտաբ ագրեսիվ գործողությունների, Ադրբեջանի ռազմական հանցագործությունների, խաղաղ բնակչության դեմ հանցագործությունների մասին ՌԴ մոտեցումների քննարկումները, ինչպես նաև բանակցային գործընթացի հեռանկարների դիտարկումը, որի էությունը, անկասկած, Լեռնային Ղարաբաղի ժողովրդի ինքնորոշման իրավունքի իրացումն է»,- ընդգծեց ՀՀ նախագահ մամուլի քարտուղարը:
Նշենք, որ ՌԴ ԱԳ նախարար Սերգեյ Լավրովի այցը Հայաստան նախատեսված է 21-22-ին:
