ԵՐԵՎԱՆ, 18 ապրիլի — Sputnik. ՀՀ ԱՆ Դատական ակտերի հարկադիր կատարման ծառայության տարածած հաղորդագրությունում նշվում է, որ ծառայության ղեկավար Միհրան Պողոսյանը հրաժարականի դիմում է ներկայացրել։
«Հայկական և միջազգային մամուլում վերջերս պանամական օֆշորների մասին հրապարակումներում ի հայտ եկավ նաև իմ անունը։ Ցավում եմ, որ անունս արծարծվում է միլիարդավոր դոլարներ իրականում սեփականացրած՝ Ադրբեջանի նախագահ Իլհամ Ալիեւի ընտանիքի կողքին։ Անընդունելի եմ համարում, որ իմ անձը պատճառ դառնա իմ երկրի և բռնապետական Ադրբեջանի միջև քաղաքակրթական որևէ զուգահեռի, ինչի համար էլ այսօր իմ հրաժարականի դիմումն եմ ներկայացրել զբաղեցրածս պաշտոնից»,- իր դիմում նշել է ԴԱՀԿ պետ Միհրան Պողոսյանը։
Նա խոստացել է օֆշորային հրապարակումներին անդրադառնալ հրապարակավ` արդեն որպես շարքային քաղաքացի՝ առանց պետական լծակների տիրապետելու:
Հայկական լրատվամիջոցների հրապարակումներում նշվում է, որ Հետաքննող լրագրողների միջազգային կոնսորցիումի (ICIJ) գաղտնազերծած ավելի քան 10 միլիոն փաստաթղթից հայտնի է դարձել, որ Միհրան Պողոսյանն ու նրա մերձավոր բարեկամները լայնորեն օգտվում են օֆշորային սխեմաներից։
