ԵՐԵՎԱՆ, 18 ապրիլի — Sputnik. Հավաքական անվտանգության պայմանագրի կազմակերպության (ՀԱՊԿ) անդամ-պետությունների արտգործնախարարների տեղակալները երեքշաբթի խորհրդատվություններ կանցկացնեն Երևանում, հայտնում է կազմակերպության մամուլի քարտուղար Վլադիմիր Զայնեթդինովը։
«Երևանում 2016 թվականի ապրիլի 19-ին կկայանան ՀԱՊԿ արտգործնախարարների տեղակալների խորհրդատվությունները, որոնց կմասնակցի նաև ՀԱՊԿ գլխավոր քարտուղարի տեղակալ Արա Բադալյանը։ Միջոցառումը նախագահելու է Հայաստանի արտգործնախարարի տեղակալ Շավարշ Քոչարյանը», — նշված է Զայնեթդինովի հայտարարության մեջ։
Հանդիպման ընթացքում ուսումնասիրվելու են ՀԱՊԿ-ի որոշ հայեցակարգային փաստաթղթերը, քննարկվելու են կազմակերպության արտաքին քաղաքականության գործունեության համակարգմանը վերաբերող հարցերը։
ՀԱՊԿ անդամներն են Ռուսաստանը, Հայաստանը, Բելառուսը, Ղազախստանը, Ղրղըզստանը և Տաջիկստանը։
