ԵՐԵՎԱՆ, 18 ապրիլի — Sputnik. Անցյալ տարվա գարնան համեմատ Հայաստանի պահանջարկն ավելացել է 38%-ով։ Դա են վկայում Momondo ծառայության ներկայացրած տվյալներ։
«Հայաստանն ու Վրաստանն այս ժամանակահատվածի ամենապահանջված ուղղություններից են։ Անցյալ տարվա մայիսյան տոների թոփ-տասնյակում այս երկու ուղղություններն ընդհանրապես չէին ընդգրկվել։ Այժմ դրանք մեծ պահանջարկ ունեն։ Ինչո՞ւ։ Նախ մոտ են, համեմատաբար մատչելի, վիզայի կարիք չկա, լեզվային խոչընդոտներ չկան, գարնանը տաք է` էքսկուրսիաների համար հրաշալի եղանակ։ Եվ շատ համեղ խոհանոց ունեն», — «Կոմսոմոլսկայա պրավդան» մեջբերում է Ռուսաստանում Momondo-ի ներկայացուցիչ Իրինա Ռյաբովոլի խոսքերը։
Նրա կարծիքով` տնտեսական իրավիճակը նույնպես մեծ դեր է խաղացել, և այժմ ռուսաստանաբնակները Եվրոպայի փոխարեն գերադասում են հանգստանալ Ռուսաստանում և մերձավոր արտասահմանում։
Բացի այդ, փորձագետները կարծում են, որ Վրաստանում և Հայաստանում ճանապարհորդելը բավականին հարմարավետ է դարձել։
Ռուսաստանում յոթ օր ոչ աշխատանքային կլինի` ապրիլի 30-ից մայիսի 3-ը, այնուհետև` մայիսի 7-ից 9-ը։
Թուրքական զբոսավայրերին այլընտրանք փնտրող զբոսաշրջիկները, բացի Հայաստանից ու Վրաստանից, նախընտրում են հանգստանալ նաև Հունաստանում։ Տարբեր տվյալներով` այս ուղղությունների պահանջարկն ավելացել է 16-86%-ով։
