ԵՐԵՎԱՆ, 18 ապրիլի — Sputnik. ՀՀ ԱԺ փոխնախագահ Էդուարդ Շարմազանովը գործընկերների հետ քննարկել է երկկողմ և բազմակողմ համագործակցությանն առնչվող հարցեր, ներկայացրել է ապրիլի սկզբում Ադրբեջանի կողմից սանձազերծված ռազմական գործողությունների մանրամասներն ու դրանց հետևանքները, ինչպես նաև` ալիևյան ռեժիմի պատասխանատվությունն այդ ամենում: Այս մասին հայտնում է ՀՀ ԱԺ մամուլի ծառայությունը։
ՀՀ ԱԺ փոխնախագահը շնորհակալություն է հայտնել Լատվիայի Հանրապետության Սաեյմայի փոխնախագահին՝ խորհրդարանական Սերգեյ Պոտապկինի` Լեռնային Ղարաբաղի Հանրապետություն կատարած այցի համար, որի արդյունքում Պոտապկինն անձամբ և տեղում է ծանոթացել իրական վիճակին:
Կողմերը ձեռք են բերել բազմաթիվ պայմանավորվածություններ՝ շարունակելու և զարգացնելու համագործակցությունն ու համատեղ աշխատանքները միջազգային խորհրդարանական հարթակներում:
ՀՀ ԱԺ պատվիրակությունը, որի կազմում են ՀՀ ԱԺ պատգամավոր, Լեհաստան-Հայաստան բարեկամական խմբի ղեկավար Հովհաննես Սահակյանը, ՀՀ ԱԺ աշխատակազմի հասարակայնության և տեղեկատվության միջոցների հետ կապերի վարչության պետ Արսեն Բաբայանը և Լեհաստանի Հանրապետությունում ՀՀ արտակարգ և լիազոր դեսպան Էդգար Ղազարյանը` ՀՀ ԱԺ փոխնախագահ Էդուարդ Շարմազանովի գլխավորությամբ, Լեհաստանում մասնակցել են քրիստոնեության ընդունման 1050-ամյակին նվիրված պաշտոնական միջոցառումներին:
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին պայմանավորվածություն է ձեռք բերվել ռազմական գործողությունները դադարեցնելու մասին, սակայն երկու կողմն էլ հայտարարում է, որ փոխադարձ պայմանավորվածությունը խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։ Հայկական կողմն ունի 77 մարտական և 11 ոչ մարտական կորուստ, սպանվել է 4 խաղաղ բնակիչ:
