Լաուրա Սարգսյան, Sputnik.
Համր կինո կամ Չապլինի կինո, հենց այսպես կարելի է անվանել սև-սպիտակ ֆիլմերի շարքը, որտեղ արագ-արագ այս ու այն կողմ է գնում զարմանալի հերոսը, համաշխարհային կինոյի թափառաշրջիկը` Չարլին: Գլխարկը գլխին, ուղղահայաց բեղով տղամարդու հայտնի կերպարը չի կարող անտարբեր թողնել որևէ մեկին:
Ժամանակին այս տղամարդն ամբողջ աշխարհին ստիպեց խոսել իր մասին. նա ոչ միայն մեծ դերասան էր, այլև՝ կանանց մուսա (Չապլինը չորս կին է ունեցել): Իսկ երբ դերասանուհի Ջոան Բերրին Չարլիի դեմ դատական հայց ներկայացրեց՝ նրան մեղադրելով իրեն գայթակղելու համար, Չապլինին սկանդալիստ անվանեցին:
Ջոաննան նաև հայտնեց, որ երեխա է ունեցել Չարլիից: Թեև հայցը մերժվեց, քանի որ ԴՆԹ-ի թեստը չհաստատեց կնոջ պնդումը, այնուամենայնիվ դեռ երկար ժամանակ լուրեր էին պտտվում, թե Չապլինը կաշառել է դատարանին:
Այս պատմության պատճառով Չապլինի ապագա կնոջ՝ Ունա Օնիլի հայրը՝ հայտնի դրամատուրգ Յուջին Օնիլը, կտրականապես դեմ էր դստեր և հասուն տղամարդու միությանը:
Չարլիի դաժան մանկությունը
Չարլին ծնվել է Լոնդոնում 1889 թվականին դերասանների ընտանիքում: Սակայն նրա ծնողների միությունը երկար չի տևել: Երբ ծնողները բաժանվեցին, Չարլին երեք տարեկան էր, և նա ավագ եղբոր հետ մնաց մոր մոտ: Հայրը գինեմոլ դարձավ և ոչնչով չէր օգնում ընտանիքին, իսկ մայրը, որը երգելով էր գումար վաստակում, կորցրեց ձայնը:
«Մայրս հաճախ էր հայտնվում հոգեբուժարանում: Իսկ ես ու եղբայրս պարբերաբար ապրում էինք կա՛մ բանվորների մոտ, կա՛մ մանկատանը: Ես աշխատանքի տեղավորվեցի գրենական պիտույքների խանութում, ավելի ուշ՝ ապակու գործարանում: Թեև միշտ երազում էի դերասանական կարիերայի մասին»,- գրում է մեծ դերասանն իր հուշերում:
14 տարեկան էր, երբ սկսեց հաճախել թատերական գործակալություն և շուտով հայտնի դարձավ նմանակումների, սքեչերի և մանրապատումների շնորհիվ: Հանդիսատեսը պարզապես աստվածացրեց նրան, սակայն Անգլիան չէր ցանկանում տաղանդ տեսնել մի տղայի մեջ, որն անգամ նորմալ կարդալ չգիտեր: Չնայած դրան՝ նա կարիերայում մեծ հաջողությունների հասավ, ինչը չի կարելի ասել անձնական կյանքի մասին:
Սիրային տառապանքներից մինչև սիրելի Ունի
Նրա առաջին կինը 17-ամյա Միլդրեթ Հարիսն էր, որի հետ Չապլինն ապրեց 3 տարի: 16-ամյա Լիտա Գրեյի հետ ամուսնությունից Չարլին երկու երեխա ունեցավ: Երրորդ կինը Պոլետ Գոդարն էր, որի հետ Չարլին ապրեց 6 տարի:
Եվ վերջապես միայն չորրորդ և ամենավերջին ամուսնությունը Չարլիին երջանկություն բերեց: Դերասանի չորրորդ կինը Ունա Օնիլն էր, որը 37 տարով փոքր էր դերասանից: Ունային սիրահարված էր նաև Ջերոմ Սելինջերը և բազմաթիվ անգամ ամուսնության առաջարկ էր արել նրան:
Ունան և Չարլին հանդիպեցին նկարահանման հարթակում: Կապուտաչյա, վայելչակազմ և գեղեցիկ տղամարդը որևէ կերպ չէր հիշեցնում Ունայի ճանաչած Չապլինին: Իսկ Չապլինը միանգամից հասկացավ, որ գտել է նրան, որին փնտրում էր ողջ կյանքում:
«Որքան ավելի լավ եմ ճանաչում նրան, այնքան ավելի շատ է դուր գալիս նրա համբերատարությունը, հումորը, հարգանքը դիմացինի կարծիքի նկատմամբ: Ես նրան խենթորեն սիրահարվեցի, այնպես, ինչպես միայն կարող է սիրահարվել դեռահաս պատանին: Սակայն ես վախենում էի մեր տարիքային տարբերությունից: Չէ՞ որ նրա հայրն ինձնից մեծ էր ընդամենը մեկ տարով», — ավելի ուշ կգրի Չարլին իր հուշատետրում:
Սակայն Ունան օգնեց նրան հաղթահարել այդ վախը, և ֆիլմի պրեմիերայից հետո զույգը որոշեց ամուսնանալ: Շարունակությունը հեքիաթի նմանվեց՝ Ունան ու Չարլին ամուսնացան, ունեցան 7 զավակ ու միասին ապրեցին մինչև մահ:
Չարլին մահացավ 88 տարեկանում Շվեյցարիայում, իսկ մահվանից առաջ գրեց. «Ես հեռանում եմ, սակայն երջանիկ եմ գնում այն աշխարհ, քանի որ զբաղվել եմ սիրելի գործով և ապրել մի կնոջ հետ, որին սիրել եմ խենթի պես»:
