ԵՐԵՎԱՆ, 16 ապրիլի — Sputnik. Եվրոպայի առաջնության տղամարդկանց 105 կգ քաշային կարգի A ենթախմբում մրցում էին 10 մարզիկ Ավստրիայից, Գերմանիայից, Ռուսաստանից, Բուլղարիայից, Վրաստանից, Լեհաստանից և Լատվիայից: Այս մասին հայտնում է Հայաստանի ազգային օլիմպիական կոմիտեի մամուլի ծառայությունը:
Պոկում վարժության առաջին մոտեցման ժամանակ Մարտիրոսյանը բարձրացրեց 182 կգ: Սակայն հաջորդ երկու մոտեցումների ժամանակ Մարտիրսյանը գլխավերևում չպահեց 184 կգ և 185 կգ: Պոկում վարժությունում պատանեկան Օլիմպիական խաղերի չեմպիոնը նվաճեց արծաթե մեդալ:
Հրում վարժությունում Մարտիրոսյանը նախ բարձրացրեց 215 կգ, այնուհետև՝ 220 կգ, բայց չհանեց 225 կգ: Հրում վարժությունում նա գրավեց 3-րդ տեղը, իսկ երկամարտի 402 կգ արդյունքով դարձավ Եվրոպայի առաջնության բրոնզե մեդալակիր:
Եվրոպայի առաջնության վերջին օրը մեդալների համար կպայքարեն նաև Հռիփսիմե Խուրշուդյանը, Արփինե Դալալյանը և Գոռ Մինասյանը:
