ԵՐԵՎԱՆ, 15 ապրիլի — Sputnik. Ռուսաստանի Դաշնության Դաշնային ժողովի Դաշնային խորհրդի պաշտպանության և անվտանգության կոմիտեի նախագահ Ալեքսանդր Չեկարինն էլ հավելեց, որ հայտարարության տեքստը պետք է քննարկվի և ընդունվի ռուսաստանյան պառլամենտական 3 հանձնաժողովների կողմից, և հայկական կողմի հետ լրամշակված տարբերակը համաձայնեցնելուց հետո ընդունվի ու հրապարակվի։ Իսկ մինչ այդ կողմերը չցանկացան բացահայտել հայտարարության մեջ տեղ գտած մտքերը։
Փոխարենը հանդես եկան ելույթներով։ ՀՀ ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանը հայտնեց, որ նիստի ընթացքում քննարկվել է տարածաշրջանային անվտանգության և հատկապես հարավային Կովկասում ռազմաքաղաքական իրավիճակը, ռազմատեխնիկական և ռազմաարդյունաբերության ոլորտում հայ-ռուսական համագործակցության խորացումը, միջազգային ահաբեկչության, ծայրահեղականության և այլատյացության դրսևորումներին հակազդումը։
«Ռուս գործընկերների հետ քննարկել ենք ԼՂՀ-ի դեմ Ադրբեջանի ագրեսիան` ուղեկցված լայնամասշտաբ ռազմական գործողություններով։ Դրանով պայմանավորված մարտահրավերները տարածաշրջանային և միջազգային անվտանգության համար»,- ասաց Կորյուն Նահապետյանը` հավելելով, որ քննարկման մասնակիցները կարևորել են ԼՂ խաղաղ կարգավորումն ու բանակցային գործընթացի շարունակումը ԵԱՀԿ ՄԽ շրջանակում։
Կողմերը համաձայնության են եկել նաև հակաօդային պաշտպանության (ՀՕՊ) համակարգի ստեղծման հարցում, քննարկել են նաև ռազմական արդյունաբերության համատեղ նոր ձեռնարկությունների ստեղծման հեռանկարները։
«Խիստ քննադատության է արժանացել ահաբեկչական կազմակերպություններին սատարող երկրների` տարածաշրջանն ապակայունացնող քաղաքականությունը»,- տեղեկացրեց Կորյուն Նահապետյանը` նշելով, որ բոլոր քննարկված հարցերն ու դրանց ուղղությամբ առաջարկվող քայլերը տեղ են գտնելու երկու երկրների խորհրդարանների պաշտպանության եւ անվտանգության հանձնաժողովների ընդունելիք հայտարարության մեջ։
ՌԴ ԴԺ ԴԽ պաշտպանության և անվտանգության կոմիտեի նախագահ Ալեքսանդր Չեկարինն էլ հայտարարեց, որ քննարկումն անցել է աննախադեպ փոխադարձ հասկացվածության մթնոլորտում։ Նա հիշեցրեց, որ խորհրդարանականների հանդիպումը ծրագրվել էր դեռևս 4 տարի առաջ, երբ «ոչ ոք չէր ենթադրում ապրիլյան իրադարձությունները շտկումներ կմտցնեն նախապես որոշված հարցերի շրջանակում»,- ասաց ռուսաստանցի խորհրդարանականը։
Նույն կոմիտեի անդամ Ալեքսեյ Կոնդրատևն էլ կարևորեց, որ համատեղ աշխատանքի արդյունքում, իր բնորոշմամբ, աշխարհին ներկայացվի «կոլեկտիվ անվտանգության պայմանագրով միավորված երկու եղբայրական ժողովրդի» միասնական դիրքորոշումը։
