ԵՐԵՎԱՆ, 14 ապրիլի — Sputnik. Նազիկ Ավդալյանը նշեց, որ իր հաղթանակը նվիրում է արցախյան առաջնագծում զոհված հայ զինվորականներին և այժմ հայրենիքը պաշտպանողներին:
Ավդալյանը 69 կգ քաշային կարգում երկամարտում հավաքեց 237 կգ և 1 կգ-ով գերազանցեց արծաթե մեդալակրին:
Պոկում վարժությունում նա 105 կգ արդյունքով գրավեց երկրորդ տեղը: Առաջինը բելառուս Դարյա Պաչաբուտն էր՝ 106 կգ արդյունքով:
Հրում վարժությունում Պաչաբուտը պայքարն ավարտեց 130 կգ արդյունքով, իսկ Ավդալյանը կարողացավ վերջին մոտեցմանը բարձրացնել 132 կգ և ապահովել ոսկե մեդալ:
Տղամարդկանց 85 կգ քաշային կարգում B խմբում Աղասի Աղասյանը երկամարտի 346 կգ (153+193) արդյունքով գրավեց առաջին տեղը: A խմբի մասնակիցները մրցահարթակ դուրս կգան ավելի ուշ:
Նշենք, որ 2009թ. աշխարհի չեմպիոն Նազիկ Ավդալյանը ավտովթարի հետևանքով ստացած ողնաշարի ծանր վնասվածքից հետո անցյալ տարի մրցահարթակ վերադառնալուց հետո նվաճում է առաջին տիտղոսը:
