ԵՐԵՎԱՆ, 14 ապրիլի — Spuntik. Խաչատուր Քոքոբելյանի օրենսդրական նախաձեռնությունը ենթադրում է, որ խորհրդարանի կողմից ընդունվելու պարագայում ԱԺ-ն պետք է հանդես գա հայտարարությամբ` ՀՀ նախագահին ու կառավարությանը դիմելով ԵԱՏՄ-ին ՀՀ անդամակցությունը դադարեցնելու գործընթաց սկսելու մասին։
Իր օրենսդրական նախաձեռնությունը Քոքոբելյանը Sputnik Արմենիայի հետ զրույցում մեկնաբանեց նախ տնտեսական դրդապատճառներով` նշելով, որ «ԵԱՏՄ-ին անդամակցելուց ի վեր ՀՀ բոլոր տնտեսական ցուցանիշները` թե´ արտահանում դեպի ԵԱՏՄ անդամ երկրներ, թե´ ներմուծում, շեշտակիորեն նվազել են»։
Այս տեսակետից Խաչատուր Քոքոբելյանը կարծում է, որ ԵԱՏՄ-ին անդամակցությունը Հայաստանի համար ոչ թե հնարավորություն, այլ մարտահրավեր է։
Պատգամավորն իր նախաձեռնությունը հիմնավորում է նաև ապրիլին ԼՂ-ում սանձազերծված պատերազմով։ Քոքոբելյանի բնորոշմամբ` Նազարբաևի միջոցով Ադրբեջանը կարողացավ կասեցնել Երևանում նախանշված ԵԱՏՄ երկրների վարչապետների խորհրդի նիստի անցկացումը։
Քոքոբելյանը վստահեցրեց, որ իր հեղինակած օրենքի նախագիծն ինքնանպատակ չէ։ Նա չբացառեց, որ նույնիսկ այն քաղաքական ուժերն ու անհատ գործիչները, ովքեր ժամանակին կողմ էին ԵԱՏՄ-ին Հայաստանի անդամակցությանը, ԼՂ-ում տեղի ունեցած վերջին իրադարձություններից հետո կաջակցեն իր նախաձեռնությանը։
