ԵՐԵՎԱՆ, 14 ապրիլի — Sputnik. Թուրքիայի հայ համայնքն ուսումնասիրում է Սուրբ Կիրակոս եկեղեցու պետականացման որոշումը և պատրաստվում է սահմանված ժամկետում նախարարների խորհրդի որոշումը չեղյալ համարելու համար դիմել դատարան, օրեր առաջ հայտնեցին ԶԼՄ-ները։
Ստամբուլում հրատարակվող հայկական «Ակոս» թերթի խմբագրապետ Բագրատ Էստուկյանը Sputnik Արմենիա ռադիոկայանի հետ զրույցում նշեց, որ Պոլսի Հայ պատրիարքարանի դատական դիմումի մասին որևէ տեղեկություն չունի, միայն գիտե, որ Դիարբեքիրի Քաղքեդոնական և Բողոքական եկեղեցիների հոգաբարձությունները նման դիմում ներկայացրել են։
Նրա խոսքով` պաշտոնյաները հայտարարում են, որ եկեղեցիների պետականացումը խնդրո առարկա չէ, պետականացումն ավելի շատ քաղաքացիներին պատկանող բնակարաններին և գործարաններին է վերաբերում։
Մերձավոր Արևելքի ամենամեծ եկեղեցիներից մեկի՝ Սուրբ Կիրակոսի վերաբացումն ու օծումը տեղի է ունեցել 2011թ. հոկտեմբերի 22-ին, իսկ առաջին պատարագը մեկ օր անց՝ հոկտեմբերի 23-ին:
Սուրբ Կիրակոսի վերանորոգումն իրականացվել է դիարբեքիրցի հայերի և Դիարբեքիրի քաղաքապետարանի աջակցությամբ: Սուրբ Կիրակոսը վերաբացվել է որպես գործող եկեղեցի:
