ԵՐԵՎԱՆ, 14 ապրիլի — Sputnik. ՀՀ-ում ԵՄ պատվիրակության ղեկավար, դեսպան Պյոտր Անտոնի Սվիտալսկին այսօր քաղաքացիական հասարակական կազմակերպությունների կարողությունների զարգացմանը նվիրված քննարկման ժամանակ հրաժարվեց պատասխանել Ղարաբաղի խնդրի մասին հարցերին։
«Պատրաստ եմ ձեզ հետ խոսել ԼՂ-ի մասին, բայց` այլ առիթով։ Եկեք մեր պատվիրակության գրասենյակ, և մենք քննարկում կկազմակերպենք այդ հարցի շուրջ»,- ասաց նա։
Լրագրողների համառ հարցադրումներին զիջելով` ԵՄ-ի դեսպանն, այնուամենայնիվ, անդրադարձավ ԼՂ-ի հակամարտության կարգավորման խնդրին։
«Պատերազմը վատ է ցանկացած երկրի համար,- ասաց դեսպան Սվիտալսկին,- մենք լիահույս ենք, և այս ծրագիրը նույնպես կազմվել է այն ընկալումով, որ տարածաշրջանը շուտով տեղափոխվելու է խաղաղ դաշտ։ Եթե խաղաղությունը հաստատվի և մենք ունենանք այս հակամարտության դրական լուծում, ապա Հայաստանը մեծապես կշահի դրանից»։
Դեսպանը հայ լրագրողներին կոչ արեց չկորցնել պատերազմական իրավիճակներից, հակամարտության թեժացումից խուսափելու հույսը, և ինքն էլ հույս հայտնեց, որ մոտ ապագայում կողմերին կտեսնենք մեկ սեղանի շուրջ` բանակցելիս։
Դրա համար, Պյոտր Անտոնի Սվիտալսկիի համոզմամբ կարևոր է, որ երկխոսություն սկսեն Հայաստանի և Ադրբեջանի քաղաքացիական հասարակության ներկայացուցիչները։
Իսկ քաղաքացիական հասարակության կարողությունները զարգացնելու համար ԵՄ-ն երկու երկրում նոր ծրագիր է իրականացնելու։ Հայաստանյան ծրագրի ներկայացմանն իր ելույթում ԵՄ դեսպանը խոսեց հայկական գենի մասին` նշելով, որ դրանում ներդրված է հույսը միայն սեփական ուժերի վրա դնելու գաղափարը, որի շնորհիվ էլ հայերը դարեր շարունակ մաքառել ու գոյատևել են։
«Դա է հայերի ու մնացած ազգերի տարբերությունը։ Կարծում եմ, որ հայերի համար ինքնակազմակերպումը բնական բնազդ է։ Մնում է միայն նրանց տրամադրել անհրաժեշտ գործիքներ»,- ասաց դեսպանը։
Անհրաժեշտ գործիքներ տրամադրելու և քաղաքացիական հասարակության կարողությունները զարգացնելու համար ԵՄ-ն 2.8 մլն եվրո է տրամադրել, որի հիմանական մասը ծախսվելու է տեղական ՀԿ-ների համար ուսուցման դասընթացներ կազմակերպելու, 1 միլիոնը` փոքր դրամաշնորհային ծրագրեր ֆինանսավորելու համար։ Ընդ, որում, նախապատվությունը տրվելու է մարզերում գործող կազմակերպություններին, որոնց, ծրագրի ղեկավար, լեհական «Պոդլասկայի շրջանային զարգացման հիմնադրամի» նախագահ Անդրեյ Պարաֆինյուկի բնորոշմամբ` մայրաքաղաքից գումարներ հազվադեպ են հասնում։
Ինչ վերաբերում է ՀԿ-երի նկատմամբ ձևավորված բացասական կարծիքին ու հաճախ հնչող «գրանտակեր» բնորոշմանը, Sputnik Արմենիայի հարցին ի պատասխան Անդրեյ Պարաֆինյուկը նշեց, որ կազմակերպություններն իրենց աշխատանքով առաջին հերթին պետք է շահեն նրանց վստահությունը, որոնց համար աշխատում եմ։
«Սա էլ մի դաս է, որ Հայաստանը պետք է սովորի, ինչպես համոզել շահառուներին, նրանց վստահությունը շահելու ու ցույց տալու համար, որ ամեն ինչ արվում է նրանց շահերից ելնելով»,- ասաց լեհ փորձագետը`համոզմունք հայտնելով, որ այդ դեպքում քաղաքացին էլ պատրաստ կլինի ֆինանսապես աջակցել իր շահերը պաշտպանող քաղաքացիական հասարակության ներկայացուցիչներին։
Ի դեպ, եվրոպական զարգացած երկրներում քաղաքացին կարող է իր վճարած հարկերի որոշ տոկոսը կամավոր ուղղել հենց Հասարակական կառույցների ֆինանսավորմանը, ուստի ծրագրի ղեկավարները չեն բացառում, որ ՀԿ-ների նոր օրենքի ընդունմամբ այս հնարավորությունը կտրվի նաև Հայաստանի հարկատուներին։
