ԵՐԵՎԱՆ, 14 ապրիլի — Sputnik. Ծանրամարտի Հայաստանի հավաքականի անդամ Անդրանիկ Կարապետյանը նախօրեին Եվրոպայի չեմպիոն դարձավ։ Հայաստանի ազգային օլիմպիական կոմիտեի մամուլի ծառայությունը զրուցել է մարզիկի հետ։
Անդրանիկ Կարապետյանը նշել է, որ Եվրոպայի առաջնությունից հետո իր մեջ իրականում ոչինչ էլ չի փոխվել։
«Ես մնացել եմ նույն Անդրանիկը: Միայն թե այս պահին ուրախությանս չափ չկա: Երջանիկ մարդ եմ, որ կարողացա Եվրոպայի առաջնությունում ավելացնել կիլոգրամներս»,- ասել է ծանրամարտիկը:
Օլիմպիական խաղերին մասնակցելու վերաբերյալ էլ ասել է, որ մեդալների չի ձգտում, նրա հիմնական նպատակն առաջին հորիզոնականն է: «Սա սպորտ է և ամեն ինչ կարող է լինել: Հիմա արդեն հիմնական շեշտը դրված է Օլիմպիական խաղերի վրա: Եվրոպայի առաջնությունից հետո սկսելու ենք նախապատրաստվել Օլիմպիական խաղերին»:
Անդրանիկ Կարապետյանը նշել է, որ Եվրոպայի առաջնությունում իր համար կարևոր էր այն, որ ավելի բարձր կիլոգրամներ ցույց տա, քան աշխարհի առաջնությունում էր ցույց տվել, ինչն էլ հենց ստացվեց: Զրույցի վերջում նա նշել է.
«Այս հաղթանակս նվիրում եմ ՀՀ և ԼՂՀ սահմանին զոհված զինվորներին: Իրենց գործի շարունակողը ինչ-որ տեղ նաև մենք ենք: Մենք ուժեղ ազգ ենք: Մեծ ցավ էինք ապրում, որ հավաքների պատճառով չէի կարող լինել մեր զինվորների կողքին: Հուսով եմ այս հաղթանակը կոգևորի մեր զինվորներին»,- ասել է Կարապետյանը:
Նշենք, որ Ծանրամարտի Հայաստանի հավաքականի անդամ Անդրանիկ Կարապետյանը դարձավ Եվրոպայի չեմպիոն, իսկ Տիգրան Մարտիրոսյանը՝ Եվրոպայի առաջնության փոխչեմպիոն:
Տղամարդկանց 77 կգ քաշային կարգում մասնակցում էր 10 մարզիկ Ալբանիայից, Բուլղարիայից, Գերմանիայից, Ռումինիայից, Լեհաստանից, Իսպանիայից և Հայաստանից:
