ԵՐԵՎԱՆ, 13 ապրիլի — Sputnik. Ապրիլի 13-ին արդեն որոշվել են չեմպիոնն ու մրցանակակիրները կանանց 63 կգ քաշային կարգում:
Այստեղ Հայաստանը ներկայացնում էր գյումրեցի Քրիստինե Պետրոսյանը: Մեր մարզուհին պոկում վարժությունում գլխավերևում պահեց 93կգ կշռող ծանրաձողը և ընթանում էր հինգերորդ տեղում: Հրում վարժությունում նա հիանալի կերպով օգտագործեց բոլոր մոտեցումները` ի վերջո ապահովելով 114 կգ արդյունքը: Երկամարտում հայ մարզուհին 207 կգ արդյունքով զբաղեցրեց հինգերորդ տեղը:
Մրցակցությունից դուրս էր Ռուսաստանը ներկայացնող Նատալյա Խլեստկինան, որը երկամարտի 222 կգ (99+123) արդյունքով նվաճեց Եվրոպայի չեմպիոնի կոչումը: Արծաթե մեդալակիր դարձավ Ռուսաստանի ևս մեկ ներկայացուցիչ՝ Դիանա Ախմետովան (219կգ), իսկ բրոնզե մեդալը նվաճեց իտալուհի Ջիորջիա Բորդինյոնը (219կգ):
Ապրիլի 13-ին երեկոյան մրցահերթում մեդալների համար պայքարի մեջ են մտնելու Տիգրան Մարտիրոսյանն ու Անդրանիկ Կարապետյանը 77 կգ քաշային կարգում:
