ԵՐԵՎԱՆ, 13 ապրիլի — Spuntik. Մարտակերտ քաղաքն այսօր ապրում է իր բնականոն կյանքով, բոլոր ենթակառուցվածքները գործում են, բնակիչները վերադարձել են իրենց բնակարաններ։ Ադրբեջանական հրետակոծությունից առավել լուրջ վնասված բնակարանները դեռ վերանորոգման փուլում են։
Մարտակերտի դպրոցում վերսկսվել է ապրիլի 2-ի առավոտյան ադրբեջանական հրետակոծության հետևանքով ընդհատված դասապրոցեսը։
«Երեխաները հաճախում են դպրոց։ Իսկ ծնողները, թեև դեռ փոքր-ինչ անհանգստությամբ են ճանապարհում նրանց, բայց վստահում են սահմանը պահող զինվորին և համոզված են, որ եթե հանկարծ Ադրբեջանն էլի փորձի ոտնձգություններ կատարել, ապա համապատասխան արձագանք կստանա»,-Sputnik Արմենիային հայտնեց Արտակ Բեգլարյանը։
ԼՂՀ իշխանությունները քառօրյա պատերազմի ընթացքում արցախցիների կրած վնասների ամբողջական չափը թեև դեռ չեն հաշվարկել, բայց վստահեցնում են, որ բոլոր, այդ թվում` գույքային վնասները մինչև վերջին լուման փոխհատուցվելու են` լինի դա պետական բյուջեի, թե բարեգործների աջակցությամբ։
ԼՂՀ վարչապետի մամուլի խոսնակը տեղեկացրեց նաև, որ Ղարաբաղում բնականոն աշխատանքի են վերադարձել անգամ արդյունաբերական ձեռնարկությունները։ Նրա խոսքով` Մարտակերտի շրջանում` Ստեփանակերտից 40 կմ հեռավորության վրա գտնվող Կաշենի պղնձամոլիբդենային հանքավայրի շուրջ 1500 աշխատակիցներն այս օրերին արդեն աշխատանքի են գնում։
