ԵՐԵՎԱՆ, 12 ապրիլի — Sputnik. Կարմիր խաչի միջազգային կոմիտեն ղարաբաղյան հակամարտության կողմերի գերիների մասին տեղեկություն չունի, երեքշաբթի հայտնեց Հայաստանում ԿԽՄԿ պատվիրակության հաղորդակցման ծրագրերի ղեկավար Զառա Ամատունին։
«Այսօրվա դրությամբ մենք պաշտոնական հաստատում ռազմագերիների առկայության վերաբերյալ որևէ կողմից չենք ստացել: Մենք, համաձայն մեր մանդատի, իրավունք ունենք այցելել ռազմագերիներին, երբ կողմերից ստանանք այդ մասին հաստատում», — ասաց նա։
Ամատունին նաև հայտնեց, որ ԿԽՄԿ-ն ակտիվ աշխատանք չի տանում անհայտ կորած զինծառայողին որոնելու ուղղությամբ։
«Մենք շարունակում ենք մնալ կապի մեջ կողմերի հետ, բայց կոնկրետ այս հարցի վերաբերյալ առայժմ որևէ տեղեկություն չկա», — ավելացրեց նա։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին պայմանավորվածություն է ձեռք բերվել ռազմական գործողությունները դադարեցնելու մասին, սակայն երկու կողմն էլ հայտարարում է, որ փոխադարձ պայմանավորվածությունը խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
