ԵՐԵՎԱՆ, 12 ապրիլի — Sputnik. Մոսկվայում սպանված Դեդ Հասանի բարեկամ, «օրենքով գող» Երևանցի Ռաֆիկին 5 տարի ժամկետով արգելել են մուտք գործել Ուկրաինայի տարածք, հայտնում է երկրի ազգային ոստիկանության մամուլի ծառայությունը երեքշաբթի։
«Ուկրաինայից վտարվել է Երևանցի Ռաֆիկ մականունով «օրենքով գողը»… ով Ուկրաինա էր ժամանել մի քանի օր առաջ։ Նա փորձում էր վերահսկողություն հաստատել կազմակերպված հանցագործ խմբի գործունեության նկատմամբ, որի ակտիվ մասնակիցներն են կովկասցիները։ Ապրիլի 11-ին Ուկրաինայի միգրացիոն պետական ծառայությունը որոշում կայացրեց 5 տարով արգելել նրա մուտքը Ուկրաինա։ Նույն օրը Ռաֆիկ Ամոյանը «Բորիսպոլ» օդանավակայանից մեկնեց Հայաստան», — ասվում է հաղորդագրության մեջ։
Իրավապահների տեղեկատվության համաձայն` 52-ամյա Ռաֆիկ Ամոյանը առաջին անգամ դատապարտվել է 1979 թվականին, իսկ վերջին անգամ` 2011 թվականին։ Նա պատիժ էր կրում գողություն, խուլիգանություն, զենքի ու թմրանյութերի անօրինական օպերացիաներ կատարելու համար։
Ոստիկանությունից նշեցին, որ Ամոյանը Մոսկվայի կենտրոնում սպանված, նախկին ԽՍՀՄ տարածքի ամենաազդեցիկ հանցագործ, «օրենքով գող» Ասլան Ուսոյանի` Դեդ Հասանի բարեկամն է։
