ԵՐԵՎԱՆ, 12 ապրիլի — Sputnik. Գոհար Սարգսյան. Արծվիկ Մինասյանը վստահեցրեց` Հայաստանը կա և շարունակում է մնալ ամենաապահով երկրներից մեկը։ Այնուհետև հավելեց, որ ներկայում իրականացվում են լայնամասշտաբ գործողություններ օտարերկրյա ուղղակի ներդրումների ուղղությամբ։
«Այն ագրեսիան, այն թշնամական, պատերազմական գործողությունը, որ Ադրբեջանը նախաձեռնել էր և նպատակ ուներ նաև հարվածելու մեր տնտեսական աճին, չի հաջողվել, և դա կտեսնեք նաև ցուցանիշներով։ Որքան էլ տարբեր կարծիքներ հնչեն ներդրողների՝ տարբեր որոշումների վերանայումների կամ սառեցումների հետ կապված, վստահ ենք, որ դրանք շատ արագ կվերանան»,-ասաց Արծվիկ Մինասյանը։
Նախարարն ընդգծեց, որ Հայաստանը պետք է լավ հարաբերություններ ունենա իր հարևանների հետ, միաժամանակ ավելացրեց, որ մենք մեր հարևաններին չենք ընտրում։
«Հարևանները կան, իսկ նրանք, ովքեր թշնամի են համարում Հայաստանին, դժվար է այդպիսի հարևանի հետ լավ հարաբերություն ունենալ»,-ասաց նա։
Նա նաև նշեց, որ անհրաժեշտ է ուժեղացնել տնտեսությունը, որպեսզի այդպիսի հարևանը քայլ չկատարի ագրեսիվ մղումներով, որպեսզի չկարողանա ոտնձգություն կատարել Հայաստանի նկատմամբ։ Վստահեցրեց, որ հայ-գերմանական տնտեսական համագործակցությունն օրինակելի է լինելու, և այլ երկրներ կփորձեն նմանվել երկու երկրի տնտեսական հարաբերություններին։
Ի պատասխան այս ամենին, Հայաստանում Գերմանիայի Դաշնային Հանրապետության արտակարգ և լիազոր դեսպանն ասաց, որ անցյալ տարի Հայաստանի ու Գերմանիայի միջև առևտրաշրջանառության աճ է գրանցվել։
«Կարծում եմ, որ սպառված չէ այն ներուժը, որ գոյություն ունի առևտրային ու ներդրումային ոլորտում մեր երկրների հարաբերությունները զարգացնելու համար։ Հայաստանում արդյունավետ կերպով զարգանում է տեղեկատվական տեխնոլոգիաների ոլորտը։ Այս տարվա հունիսին Գերմանիայի էկոնոմիկայի նախարարությունը ծրագրում է ՏՏ ոլորտի ներկայացուցիչների հետ այցելել Հայաստան»,- ասաց դեսպանը։
Նրա խոսքով` զարգացման լայն հնարավորություններ կան նաև այլ ոլորտներում` գյուղատնտեսություն, տեքստիլ արդյունաբերություն, զբոսաշրջություն։
Գերմանիան երկկողմ հարաբերություններում Հայաստանի երրորդ խոշոր տնտեսական գործընկերն է և հայաստանյան շուկայում ներկայանում է իր շուրջ 700 ընկերություններով։
Վերջում դեսպանը նշեց, որ Հայաստանի մեկուսացած աշխարհագրական դիրքը խոչընդոտներ է ստեղծում հատկապես օտարերկրյա ներդրումների համար։ Նրա համար ցանկալի կլիներ, որ Հայաստանը լավ հարաբերություններ ունենար հարևանների հետ։
