ԵՐԵՎԱՆ, 12 ապրիլի- Sputnik. Բորիս Էյֆմանի բալետի թատրոնը Հայաստանում և Վրաստանում կցուցադրի «Աննա Կարենինա» ներկայացումը։
Հյուրախաղերը կմեկնարկեն ապրիլի 12-ին և կավարտվեն ապրիլի 16-ին։ Երևանյան ելույթները Հայաստանում Ռուսաստանի օրերի ծրագրի մի մասը կկազմեն։
Անդրկովկասում Էյֆմանի բալետի թատրոնի նախորդ հյուրախաղերը տեղի են ունեցել 2013թ.-ի նոյեմբերին։ Այն ժամանակ հայ և վրացի հանդիսատեսին էր ներկայացվել «Մեղքից այն կողմ» բեմադրությունը։
Երևանում Էյֆմանի բալետի արտիստները ելույթ կունենան ապրիլի 12-ին և 13-ին։
«Հանդիսատեսը սիրում է մեզ, բայց միևնույն է` մենք յուրահատուկ ջերմությամբ ենք հիշում այն աներևակայելի ընդունելությունը, որին արժանացանք երկուսուկես տարի առաջ Հայաստանում և Վրաստանում։ Պարը հոգեկան շփման միակ յուրահատուկ միջոց է, որը մարդկանց օգնում է փոխըմբռնման հասնել»,- ասել է Էյֆմանը։
Պարուսույցի խոսքով` թատրոնը «հաճույքով է վերադառնում Երևան և Թբիլիսի, իսկ «Աննա Կարենինա» ներկայացումը ցուցադրում է Ռուսաստանի ժամանակակից բալետային արվեստն ու բացահայտում թատրոնի էսթետիկ անհատականությունը»։
Աշխարհի առաջատար բալետային քննադատները բարձր գնահատական են տվել «Աննա Կարենինա» բալետին։ Լյուսիս Սիգալը Los Angeles Times-ից նշել է. ««Աննա Կարենինան» ցուցադրում է Էյֆմանի ստեղծագործական հանդգնությունը և վերահաստատում, որ նրա թատրոնը զգայականության, ուժի և հղկված տեխնիկայի փայլուն համադրություն է»։
