ԵՐԵՎԱՆ, 10 ապրիլի — Sputnik. ԼՂՀ կառավարությունը հրապարակել է կառավարությունում ձևավորված օպերատիվ շտաբի միջոցով ապրիլի 4-8-ը հավաքագրված նյութական օգնության ամբողջական ցանկը, ասված է ԼՂՀ կառավարության կայքում։
Այդ նյութական օգնությունը տարբեր կազմակերպություններ ու անհատներ ուղարկել են ԼՂ` ռազմական գործողություններից տուժած քաղաքացիներին և պաշտպանության բանակին աջակցելու համար:
Սնունդ, ծխախոտ, հագուստ, ըմպելիք, միրգ-բանջարեղեն, տնտեսական ապրանքներ ու դեղորայք` սկսած մի քանի հատից մինչև մեկ ավտոմեքենա: ԼՂ-ին օգնության են հասել դպրոցականները և ուսանողները, տոնավաճառների աշխատակիցներն ու քաղաքական գործիչները` յուրաքանչյուրն իր հնարավորությունների չափով:
Ապրիլի 1-ի լույս 2-ի գիշերը ղարաբաղյան հակամարտության գոտում իրավիճակը սրվեց։ Երևանը հաղորդեց ադրբեջանական կողմի նախահարձակ գործողությունների մասին, միաժամանակ Բաքուն հայտարարեց Հայաստանի ԶՈւ կողմից գնդակոծությունների մասին։ Պաշտոնական հայտարարությունների համաձայն` երկու հակամարտող կողմերը կորուստներ ունեն։ Ապրիլի 5-ին կողմերը պայմանավորվեցին ռազմական գործողությունները դադարեցնելու մասին, բայց վերջնական հրադադար չկնքվեց։ Երկու կողմերը հայտարարում են պայմանավորվածությունները խախտելու մասին, ադրբեջանական կողմը շարունակում է կրակել նաև Հայաստանի սահմանամերձ գյուղերի ուղղությամբ։
