ԵՐԵՎԱՆ, 10 ապրիլի — Sputnik, Լաուրա Սարգսյան. Ղարաբաղում կյանքը եռում է` մարդիկ աշխատում են, զբոսնում փողոցում և ուրախանում կյանքով այնպես, ինչպես դա եղել է մինչև ապրիլի 2-ի դեպքերը, ասաց ԱԺ «Ժառանգության» խմբակցության քարտուղար Թևան Պողոսյանը:
«Այնտեղ, որտեղ ես եղել եմ (Ստեփանակերտ, Մարտունի, Շուշի), ինչպես նաև առաջնագծում, յուրաքանչյուրի մեջ տեսել եմ կորով և ուժեղ ոգի: Սա յուրահատուկ զգացողություն է, երբ մի քանի կիլոմետր քեզանից այն կողմ կռիվներ են գնում, իսկ մարդիկ այդ ժամանակ շարունակում են ապրել և իրենց կյանքով ապացուցել, որ իրենց ոգին անկոտրում է», — ասաց Պողոսյանը:
Խորհրդարանականը հասցրել է ունենալ ինչպես պաշտոնական հանդիպումներ, մասնավորապես ԼՂՀ արտգործնախարար Կարեն Միրզոյանի հետ, այնպես էլ մասնավոր` այցելելով հարազատներին և մտերիմներին: Պողոսյանը մեկնել է Ղարաբաղ, որպեսզի ցույց տա` խուճապի մատնվելու առիթ չկա:
«Սա է իմ պատասխանը` մենք ևս մեկ անգամ ապացուցեցինք, որ հնարավոր չէ վախեցնել ո՛չ ղարաբաղցիներին, ո՛չ էլ հայերին ընդհանրապես», — Sputnik Արմենիա պորտալի թղթակցի հետ զրույցում ասաց Թևան Պողոսյանը:
Պատգամավորը նշեց, որ սա փոքրիկ ուղերձ է իր ընտանիքի կողմից, նպատակն է ցույց տալ. «մենք միասին ենք, իսկ միասին մենք ուժ ենք»:
Նա նշեց, որ միասնության գլխավոր օրինակ ցույց են տալիս այն տղաները, ովքեր կանգնած են առաջնագծում և պաշտպանում են հայրենիքը:
Բազմաթիվ կամավորներ են մեկնել Լեռնային Ղարաբաղ այս օրերին ոչ միայն Հայաստանից, այլև Սփյուռքից: Յուրաքանչյուրը ցանկանում է իր ներդրումն ունենալ հայկական հողի պաշտպանության և անվտանգության գործում:
«Իմ երեխաները գիտակցում են, որ իրենց ներկայությունն այստեղ կարևոր է հենց իրենց համար, հասկանալու համար, թե ինչ է իրականում Հայրենիքը», — նշեց Պողոսյանը:
Ապրիլի 1-ի լույս 2-ի գիշերը ղարաբաղյան հակամարտության գոտում իրավիճակը սրվեց։ Երևանը հաղորդեց ադրբեջանական կողմի նախահարձակ գործողությունների մասին, միաժամանակ Բաքուն հայտարարեց Հայաստանի ԶՈւ կողմից գնդակոծությունների մասին։ Պաշտոնական հայտարարությունների համաձայն` երկու հակամարտող կողմերը կորուստներ ունեն։ Ապրիլի 5-ին կողմերը պայմանավորվեցին ռազմական գործողությունները դադարեցնելու մասին, բայց վերջնական հրադադար չկնքվեց։ Երկու կողմերը հայտարարում են պայմանավորվածությունները խախտելու մասին, ադրբեջանական կողմը շարունակում է կրակել նաև Հայաստանի սահմանամերձ գյուղերի ուղղությամբ։
