ԵՐԵՎԱՆ, 9 ապրիլի — Sputnik. Սարգսյանի և Տեր-Պետրոսյանի շուրջ մեկ ժամ տևած զրույցը բացառապես վերաբերել է ղարաբաղա-ադրբեջանական սահմանագծում տեղի ունեցած վերջին իրադարձություններին, հայտնում է ՀՀ նախագահի մամուլի ծառայությունը:
«Քննարկվել են նաև ղարաբաղյան կարգավորման բանակցային գործընթացում սպասվող առաջիկա զարգացումները և այդ մարտահրավերների հանդեպ ներազգային համախմբման անհրաժեշտությունը», ասված է հաղորդագրությունում։
Հանդիպելու նախաձեռնությունը եղել է Տեր-Պետրոսյանինը: Հանդիպումը տեղի է ունեցել Տեր-Պետրոսյանի տանը:
Ապրիլի 1-ի լույս 2-ի գիշերը ղարաբաղյան հակամարտության գոտում իրավիճակը սրվել է։ Երևանը հաղորդել է ադրբեջանական կողմի նախահարձակ գործողությունների մասին, միաժամանակ Բաքուն հայտարարել է Հայաստանի ԶՈւ կողմից գնդակոծությունների մասին։ Պաշտոնական հայտարարությունների համաձայն` երկու հակամարտող կողմերը կորուստներ ունեն։ Ապրիլի 5-ին կողմերը պայմանավորվել են ռազմական գործողությունները դադարեցնելու մասին, բայց վերջնական հրադադար չի կնքվել։ Երկու կողմերը հայտարարում են փոխադարձ պայմանավորվածությունները խախտելու մասին, ադրբեջանական կողմը շարունակում է կրակել նաև Հայաստանի սահմանամերձ գյուղերի ուղղությամբ։
