ԵՐԵՎԱՆ, 9 ապրիլի — Sputnik. Հայաստանի Հանրապետության պաշտպանության նախարար Սեյրան Օհանյանին ընդունել է ԼՂՀ նախագահ Բակո Սահակյանը, հայտնում է ՀՀ պաշտպանության նախարարության կայքը:
Հանդիպմանը, որին մասնակցել է ԼՂՀ պաշտպանության նախարար Լևոն Մնացականյանը, քննարկվել վերջին օրերին Ադրբեջանի կողմից ԼՂՀ-ի դեմ սանձազերծված լայնածավալ ագրեսիայի հետ կապված խնդիրներ: Երկուստեք կարևորվել է սերտ համագործակցության ընդլայնումը և խորացումը` որպես Հայաստանի և Արցախի պաշտպանունակության ամրապնդման և տարածաշրջանում կայունության պահպանման առանցքային գործոն:
Հայկական երկու հանրապետությունների փոխգործակցության և գործողությունների համադրման շրջանակում Արցախ կատարած աշխատանքային այցի ընթացքում ՀՀ պաշտպանության նախարար Սեյրան Օհանյանը հանդիպել է նաև ՊԲ հրամկազմի հետ: Հանդիպման ընթացքում քննարկվել են արցախա-ադրբեջանական սահմանագոտում տիրող օպերատիվ իրավիճակը, փոխգործակցության շրջանակում պլանների ճշգրտման խնդիրները և առաջնահերթ անելիքները, որոնց վերաբերյալ ՀՀ պաշտպանական գերատեսչության ղեկավարը հայտնել է իր նկատառումները:
Ապրիլի 1-ի լույս 2-ի գիշերը ղարաբաղյան հակամարտության գոտում իրավիճակը սրվել է։ Երևանը հաղորդել է ադրբեջանական կողմի նախահարձակ գործողությունների մասին, միաժամանակ Բաքուն հայտարարել է Հայաստանի ԶՈւ կողմից գնդակոծությունների մասին։ Պաշտոնական հայտարարությունների համաձայն` երկու հակամարտող կողմերը կորուստներ ունեն։ Ապրիլի 5-ին կողմերը պայմանավորվել են ռազմական գործողությունները դադարեցնելու մասին, բայց վերջնական հրադադար չի կնքվել։ Երկու կողմերը հայտարարում են փոխադարձ պայմանավորվածությունները խախտելու մասին, ադրբեջանական կողմը շարունակում է կրակել նաև Հայաստանի սահմանամերձ գյուղերի ուղղությամբ։
