ԵՐԵՎԱՆ, 9 ապրիլի- Sputnik. Լեգենդար հայազգի շանսոնիե Շառլ Ազնավուրը Ֆրանսիայի նախագահ Ֆրանսուա Օլանդի հետ քննարկել է ԼՂ-ում տիրող իրավիճակը:
Հանդիպման մասին հաղորդագրությունը տեղադրված է Ազնավուրի Facebook-ի պաշտոնական էջում: Լուսանկարը տեղադրված է Instagram-ում:
Շառլ Ազնավուրի հանդիպումը, ով նաև Շվեյցարիայում Հայաստանի արտակարգ և լիազոր դեսպանն է, տեղի է ունեցել ապրիլի 8-ին:
Ղարաբաղի ՊԲ վերջին տվյալների համաձայն` մարտական գործողությունների արդյունքում զոհվել է 44 մարդ, վիրավորվել՝ 122-ը:
Ապրիլի 1-ի լույս 2-ի գիշերը ղարաբաղյան հակամարտության գոտում իրավիճակը սրվել է։ Երևանը հաղորդել է ադրբեջանական կողմի նախահարձակ գործողությունների մասին, միաժամանակ Բաքուն հայտարարել է Հայաստանի ԶՈւ կողմից գնդակոծությունների մասին։ Պաշտոնական հայտարարությունների համաձայն` երկու հակամարտող կողմերը կորուստներ ունեն։ Ապրիլի 5-ին կողմերը պայմանավորվել են ռազմական գործողությունները դադարեցնելու մասին, բայց վերջնական հրադադար չի կնքվել։ Երկու կողմերը հայտարարում են փոխադարձ պայմանավորվածությունները խախտելու մասին, ադրբեջանական կողմը շարունակում է կրակել նաև Հայաստանի սահմանամերձ գյուղերի ուղղությամբ։
