ԵՐԵՎԱՆ, 9 ապրիլի- Sputnik. Հայաստաի ԱԳՆ շենքի դիմաց, որտեղ ընթանում է միջնորդների հանդիպումը, սկսվել է ղարաբաղյան կարգավորման հարցով ԵԱՀԿ Մինսկի խմբի համանախագահների անարդյունավետ գործունեության դեմ բողոքի ակցիան։
«Առանց հայտարարությունների և կոչերի Հայաստանի երիտասարդությունն այսօր հավաքվել է այստեղ, որպեսզի ապացուցի ԵԱՀԿ ՄԽ համանախագահներին, որ անտարբեր չէ այդ խնդիրների նկատմամբ: Մենք պատրաստակամություն ենք հայտնում, ինչպես նաև պահանջում, որպեսզի ճանաչվի Ղարաբաղի անկախությունը»,- ասաց լրագրող ակտիվիստ Հովսեփ Հովեյանը:
Նրա խոսքով՝ Լեռնային Ղարաբաղը պետք է ճանաչվի որպես բանակցային կողմ, նրա կարծիքը և խոսքը պետք է լսվի:
«Մենք դեմ ենք ահաբեկչությանը, մենք կոչ ենք անում, որպեսզի խաղաղ բնակչության դեմ զենք չկիրառվի»,- հավելեց Հովեյանը:
Հարյուրավոր տղաներ և աղջիկներ, որոնց շարքում կան սփյուռքի ներկայացուցիչներ, հավաքվել են, որպեսզի արտահայտվեն ԵԱՀԿ ՄԽ անարդյունավետ գործունեության դեմ: Հնչել են տարբեր կարգախոսներ՝ ուղղված միջնորդներին: Իսկ այդ ընթացքում ԱԳՆ շենքից դուրս եկող համանախագահներն իրենց հեռախոսներով նկարում էին ակտիվիստներին:
