ԵՐԵՎԱՆ, 8 ապրիլի — Sputnik. Ինչպես հայտնում է ՀՀ ՊՆ լրատվական ծառայությունը, Պաշտպանության նախարարն անդրադարձել է ղարաբաղա-ադրբեջանական հակամարտ զորքերի շփման գծում տեղի ունեցած մարտական գործողություններին և ձևավորված իրավիճակին:
Սեյրան Օհանյանը համանախագահների ուշադրությունն է հրավիրել վերջին օրերին ադրբեջանական կողմի բացահայտ ագրեսիայի հիմնական առանձնահատկությունների վրա, մասնավորապես` հայկական կողմի զինծառայողների և քաղաքացիական անձանց դեմ ադրբեջանական զինուժի գործած ռազմական հանցագործություններին և զինված հակամարտության իրավունքի այլ դրույթների կոպիտ ոտնահարումներին:
Պաշտպանության նախարարը հայտնել է, որ ԼՂՀ Պաշտպանության բանակի հերոսական և հմուտ գործողությունների շնորհիվ է հնարավոր եղել լիարժեք դիմադարձել Ադրբեջանի ռազմական ագրեսիան և կանխել հակառակորդի հետագա գործողությունները։
Հանդիպման ընթացքում շեշտվել է, որ Հայաստանը շարունակում է ապավինել Լեռնային Ղարաբաղի հակամարտության բանակցային կարգավորմանը: Որպես հակամարտության շուրջ ձևավորված զինված դիմակայության թուլացման նախապայման` Սեյրան Օհանյանը կարևորել է ցանկացած հրադադար իրավաբանորեն պարտավորեցնող համաձայնագրով ամրապնդելու հրամայականը:
