Գոհար Սարգսյան, Sputnik.
Մեծ հնչեղություն ստացան Լիբանանի հայաշատ Բուրջ Համուդում տեղի ունեցած ցույցերը։ Դրանցում առավել ակտիվ էին երիտասարդները։ Շուրջ 5 հազար հայ երիտասարդ Արցախի դրոշներով ու հայրենասիրական վանկարկումներով դուրս եկավ Բուրջ Համուդի փողոցներ ու միջազգային հանրությանը կոչ արեց ուշադրություն դարձնել հակամարտություն սանձազերծող կողմի գործողություններին ու վերջ դնել Ադրբեջանի ագրեսիային։
Լիբանանի հայկական վարժարաններից մեկի տնօրեն Վիգեն Ավագյանը մեզ պատմեց, որ բազմաթիվ երիտասարդներ ցանկություն հայտնեցին մեկնել Լեռնային Ղարաբաղ ու կռվել առաջնագծում։
«Բոլորին թելադրում ենք լինել կազմ ու պատրաստ, և երբ, Աստված մի արասցե, ժամը հնչի և այդ կոչը գա, հավատացեք, որ մեծ թվով տղաներ այդ կացության մեջ կգտնվեն։ Առայժմ մենք անհրաժեշտություն չենք գտնում»,- ասաց Վիգեն Ավագյանը։
Մեր զրուցակիցն ընդգծեց, որ ռազմական գործողությունների առաջին 2 օրերին ադրբեջանական պրոպագանդան այնքան ուժեղ էր, որ Լիբանանի արաբական լրատվամիջոցներն օգտվում էին նրանց «կերակրամանից»։ Հետո արդեն հայ երիասարդները գործի անցան։ Ավելին, ապրիլի 6-ին նրանք մի շարք արաբական լրատվամիջոցների ներկայացուցիչներին ուղեկցեցին Լեռնային Ղարաբաղ` տեղում լուսաբանելու տեսածը։
«Արաբական կայաններն այսօր արդեն սկսել են հաղորդումներ տալ Արցախից և հայկական տեսակետը ներկայացնել, մեր դատի իրավացիությունը ներկայացնել, Արցախի պետության տեսակետը փոխանցել արաբական աշխարհին»,-ասաց Վիգեն Ավագյանը։
Նա միաժամանակ խոստովանեց, որ Լիբանանի որոշ մահմեդականներ ադրբեջանական դիրքորոշում որդեգրեցին։ Սակայն տեղի հայերը նրանց բացատրեցին, որ ղարաբաղյան հակամարտությունը ոչ թե կրոնական, այլ ազգային ինքնորոշման հարթակի վրա է։
Լիբանանի հայկական վարժարանի տնօրենն ավելացրեց` երիտասարդական բողոքի ելույթների կողքին հատկանշականն այն է, որ Լիբանանում հանդիպում եղավ երկրում գործող ԵԱՀԿ Մինսկի հանձնախմբի դեսպանների հետ և ներկայացվեց Արցախյան հարցի էությունը։
