ԵՐԵՎԱՆ, 7 ապրիլի — Sputnik. Հանդիպմանը քննարկվել են վերջերս Ադրբեջանի կողմից Արցախի Հանրապետության դեմ սանձազերծված լայնածավալ ռազմական գործողություններին վերաբերող հարցեր, հայտնում է ԼՂՀ նախագահի մամուլի ծառայությունը:
Նախագահ Սահակյանը Ադրբեջանի ուխտադրուժ ագրեսիան համարել է Հարավային Կովկասում և հարակից տարածաշրջաններում կայունության և խաղաղության դեմ ուղղված ամենամեծ վտանգներից մեկը՝ այն որակելով նաև քաղաքակիրթ հանրության համար լուրջ մարտահրավեր:
Բակո Սահակյանն ընդգծել է, որ Արցախի պաշտպանության բանակը կասեցնում և կասեցնելու է հանրապետության անկախության, ինքնիշխանության և անվտանգության դեմ ուղղված ցանկացած ոտնձգություն՝ հավելելով, որ ԵԱՀԿ Մինսկի խմբից ակնկալում է կոշտ և հասցեական գնահատականներ ու քայլեր Ադրբեջանի ապակառուցողական քաղաքականության կապակցությամբ:
Հանդիպումից հետո ՄԽ ռուսաստանցի համանախագահ Իգոր Պոպովը լրագրողներին ասաց.
«Դուք գիտեք, որ մեր այցը սկսվել է Վիեննայում, այնուհետև մենք եղանք Բաքվում։ Քննարկվեցին իրավիճակը շուտափույթ կայունացնելուն ուղղված հարցեր, նաև մարդասիրական հարցեր։ Այդ նույն հունով տեղի ունեցավ այսօրվա հանդիպումը ԼՂՀ զինվորականների և ներկայացուցիչների հետ»,- ասաց Պոպովը։
Նա հայտնեց, որ ապրիլի 8-ին իրենք կհանդիպեն Կարմիր խաչի ներկայացուցիչների հետ, որից հետո կմեկնեն Երևան։ Հայաստանի մայրաքաղաքում նախատեսված են հանդիպումներ նախագահի, ԱԳ և պաշտպանության նախարարների հետ։
Պոպովի խոսքով` համանախագահները ապրիլի 9-ին ասուլիս կունենան Երևանում։
