ԵՐԵՎԱՆ, 7 ապրիլի- Sputnik. Հայաստանում կուտակված ռուսական ներդրումների ընդհանուր ծավալը նախկինի պես կազմում է 4 մլրդ դոլար, հանրապետությունում աշխատում է ռուսական կապիտալով 1300 ձեռնարկություն, հայտարարել է Ռուսաստանի Դաշնության վարչապետ Դմիտրի Մեդվեդևը հայ գործընկեր Հովիկ Աբրահամյանի հետ հանդիպումից հետո։
«Ապրանքաշրջանառությունը կտրուկ նվազել է, բայց նվազումը տեղի է ունեցել մթերքի գնի տատանումների պատճառով, որոնք առաքվում են մեր երկրներից միմյանց, այլ ոչ թե ֆիզիկական ծավալների նվազեցման պատճառով։ Դա ամենագլխավորն է»,- ասաց Մեդվեդևը։
Երկու վարչապետների հանդիպման ընթացքում ստորագրվել են այնպիսի ոլորտներում համագործակցության զարգացման մասին փաստաթղթեր, ինչպիսիք են խաղաղ նպատակներով տիեզերական տարածության հետազոտությունը, բնակարանային կոմունալ տնտեսությունը, քաղաքաշինությունը, շրջակա միջավայրի պաշտպանությունը, բժշկասանիտարական հսկողությունը և միջտարածաշրջանային համագործակցությունը։
«Մենք կարծում ենք, որ դա բավական դրական է, բայց դա դեռ ամենը չէ։ Մենք նաև պայմանավորվել ենք էներգետիկ հարցերի շուրջ` ներառյալ գազի առաքման հարցերը, ինչն, անկասկած, չափազանց կարևոր է ոչ միայն Հայաստանում էներգասպառման կայունության, այլև ընդհանուր առմամբ Հայաստանի Հանրապետության նորմալ զարգացումն ապահովելու համար։ Սկսվել է Հայկական ԱԷԿ-ի շահագործումը երկարացնելու գործնական ծրագիրը, որը բացառիկ նախագիծ է, սովորաբար նման նախագծերը երկար են տևում, բայց մենք Հայաստանում հույս ունենք հնգամյա ժամկետում ավարտել ամեն ինչ»,- նշել է Մեդվեդևը։
Նրա խոսքով` ընթացիկ տարվա փետրվարի 1-ից Եվրասիական տնտեսական հանձնաժողովի կոլեգիայի նոր կազմը ձեռնամուխ է եղել աշխատանքի, այն նախագահելու է Հայաստանի ներկայացուցիչ Տիգրան Սարգսյանը։
Չնայած բարդ արտաքին քաղաքական պայմաններին` երկու կողմերը պետք է բացահայտեն Եվրասիական միության ինտեգրացիոն պոտենցիալը։
«Մենք պայմանավորվել ենք, որ անցկացնելու ենք համապատասխան միջոցառումներ` հաշվի առնելով որոշումները, որոնք ընդունվել են գալիք շաբաթ Մոսկվա տեղափոխելու մասին, բայց հետագայում համապատասխան միջոցառումներ կանցկացնենք կարճաժամկետ հեռանկարում։ Խոսքը ԵՏՄ կառավարությունների ղեկավարների խորհրդակցությունների և նիստերի մասին է»,- հավելել է Ռուսաստանի վարչապետը։
