ԵՐԵՎԱՆ, 7 ապրիլի- Sputnik. Ղարաբաղի պաշտպանության բանակի օպերատիվ բաժնի պետ, գնդապետ Վիկտոր Առստամյանը ներկայացրել է հայկական կողմի կորուստները շփման գծում մարտական գործողությունները սկսվելուց ի վեր։
«Ճշգրտված տվյալների համաձայն` ապրիլի 1-7-ը Ղարաբաղի ՊԲ-ն ունեցել է 36 զոհ, այդ թվում` 9 սպա և ենթասպա, 27 սերժանտ, շարքային և պայմանագրային զինծառայող։ Վիրավորվել է 122 մարդ, այդ թվում` 24 սպա և ենթասպա, 98 սերժանտ, շարքային և պայմանագրային զինծառայող»,- հաղորդել է նա։
Առստամյանը նշել է, որ մահացածների թիվը փոխվել է, քանի որ այսօր մարտի դաշտում գտել են չորս զոհի մարմին, որոնք անհայտ կորած են համարվել։
Նա հավելել է, որ ևս մեկ զինծառայող այսօր վիրավորվել է։
Ապրիլի 1-ի լույս 2-ի գիշերը ղարաբաղյան հակամարտության գոտում իրավիճակը սրվել է։ Երևանը հաղորդել է ադրբեջանական կողմի նախահարձակ գործողությունների մասին, միաժամանակ Բաքուն հայտարարել է Հայաստանի ԶՈւ կողմից գնդակոծությունների մասին։ Պաշտոնական հայտարարությունների համաձայն` երկու հակամարտող կողմերը կորուստներ ունեն։
Ապրիլի 5-ին կողմերը պայմանավորվել են ռազմական գործողությունները դադարեցնելու մասին, բայց վերջնական հրադադար չի կնքվել։ Երկու կողմերը հայտարարում են փոխադարձ պայմանավորվածությունները խախտելու մասին։
