ԵՐԵՎԱՆ, 7 ապրիլի- Sputnik. Չորեքշաբթի Վարդենիսի ուղղությամբ տեղի ունեցած գնդակոծությունները կետային բնույթ չեն կրել, հայտարարեց Հայաստանի պաշտպանության նախարարի մամուլի քարտուղար Արծրուն Հովհաննիսյանը։
«Չնայած նրան, որ Վարդենիս քաղաքը չի տուժել, հնարավոր է` տուժել են նրա հարակից գյուղերը։ Պատահարի մանրամասներն ավելի ուշ կճշգրտվեն։ Հայկական կողմը չի խախտել հրադադարի մասին պայմանավորվածությունը»,- հայտարարեց Հովհաննիսյանը` նշելով, որ չի կարող հաղորդել, թե արդյո՞ք տեղի բնակչությունը վնաս կրել է։
Նա նաև հավելեց, որ որոշ հատվածներում հարավային ուղղությամբ ադրբեջանական կողմը գրավել է 200-250 մետր տարածք։
«Հրադադարի մասին պայմանավորվածությունից հետո հակառակորդի մոտ հարավային ուղղությամբ մնացել է 200-250 մ տարածք, որը ռազմավարական նշանակություն չունի։ Հրադադարի մասին պայմանավորվածությունից հետո զորքերը մնացել են նախկին դիրքերում»,- ասաց Հովհաննիսյանը։
Ավելի վաղ ԼՂՀ ՊՆ-ն հաղորդել էր 25 զինծառայողի մասին, որոնք անհայտ կորած են համարվում։ Տվյալ պահին որոնողական և ճշգրտման աշխատանքներ են տարվում, որոնք բարդանում են շփման գծում անկայուն իրավիճակով։
