ԵՐԵՎԱՆ, 7 ապրիլի — Sputnik. Դմիտրի Մեդվեդևի հետ Երևանում ճեպազրույցի ժամանակ ՀՀ վարչապետ Հովիկ Աբրահամյանը նշեց, որ հանդիպման ժամանակ կարևորվեց ԼՂՀ շփման գծում իրավիճակի խնդիրը, պայմանագրով ամրագրված իրադրության պահպանումն ու ամրապնդումը։
Դմիտրի Մեդվեդևը նշեց, որ իրենք չէին կարող չքննարկել ԼՂ-ի շուրջ վերջին օրերին ստեղծված իրավիճակը։ Նրա խոսքով` Ռուսաստանը խիստ անհանգստացած է այս հարցով և հույս է փայփայում, որ կոնֆլիկտը չի հասնի առավել թեժ փուլի, կվերականգնվի կրակի դադարեցման ռեժիմը, խաղաղ կարգավորումը կվերադառնա դիվանագիտական ասպարեզ։
«Հուսով ենք, որ խնդրի լուծմամբ կզբաղվեն դիվանագետները, ոչ թե զինվորականները»,- հայտարարեց ՌԴ վարչապետը։
ՌԴ վարչապետ Դմիտրի Մեդվեդևը լրագրողներին հայտնեց, որ հանդիպումն անցել է փոխըմբռնման մթնոլորտում, քննարկվել են հիմնականում երկու երկրների առևտրատնտեսական հարաբերություններին վերաբերող հարցեր։
Նշենք, որ Հայաստանում գտնվող ՌԴ վարչապետ Դմիտրի Մեդվեդևն արդեն եղել է Ծիծեռնակաբերդի հուշահամալիրում և ծաղիկներ խոնարհել անմեղ զոհերի հիշատակի առջև։ Նախատեսվում է նաև նրա հանդիպումը հանրապետության նախագահ Սերժ Սարգսյանի հետ։
