ԵՐԵՎԱՆ, 7 ապրիլի — Sputnik. Հանձնաժողովի նախագահ Հովհաննես Սահակյանը Sputnik Արմենիայի հետ զրույցում հայտնեց, որ քննարկման ընթացքում նախատեսվում է ծանոթանալ ղարաբաղա-ադրբեջանական շփման գծում Արցախի խաղաղ բնակչության նկատմամբ ադրբեջանական զինուժի գործած բռնությունների, անմարդկային վերաբերմունքի դեպքերի փաստերին, որոնք վերլուծելուց հետո միասնական փաստաթղթով կներկայացվեն միջազգային իրավապաշտպան կազմակերպություններին, տարբեր երկրների պառլամենտների իրավական հանձնաժողովներին։ Փաստաթուղթը կներկայացվի նաև ԵԱՀԿ ՄԽ համանախագահներին։
Անդրադառնալով ԵԱՀԿ ՄԽ համանախագահների հետ հանդիպման ժամանակ Ադրբեջանի պաշտպանության նախարարի հայտարարությանը, թե Ադրբեջանը կանանց ու երեխաների հետ չի կռվում, Սահակյանն ասաց.
«Մենք նոր չէ, որ իմանում ենք Ադրբեջանի վայրագությունները, նոր չէ, որ գիտենք սաֆարովյան մտածելակերպը, հետևաբար` փաստերը շատ ավելի խոսուն են։ Դրանց մասին խոսելն, իհարկե, նաև դժվար է մեզ համար, որովհետև այն, ինչ տեղի է ունեցել այդ գիշերը Թալիշում, մարդու համար անգամ բառերով նկարագրելը բավականին դժվար է»։
Ըստ պատգամավորի` փաստերը կան, միջազգային հանրությունը պետք է աչքերը լայն բացի, տեսնի այն, ինչ ակնառու է, և գոնե այստեղ պետք է ճիշտ ու հասցեական գնահատականներ հնչեցնի։
Փաստահավաք առաքելությամբ ԼՂՀ-ում է նաև ՀՀ նախկին օմբուդսմեն, իրավապաշտպան Լարիսա Ալավերդյանը։ Sputnik Արմենիայի հետ զրույցում, ներկայացնելով փաստերի հավաքագրման գործընթացը, Ալավերդյանը կարևորեց հատկապես արագ արձագանքման անհրաժեշտությունը։
«Նախորդ տարիների փորձը, հատկապես 90-ականների, ցույց տվեց, որ եթե չեն կարողանում տեղում, անմիջապես, ժամանակին հավաքագրել փաստերը, ապա հետագայում դա դառնում է շատ ավելի դժվար, և բավականին մեծ տեղեկատվական բազա ուղղակի կորչում է»,- ասաց Ալավերդյանը։
Նա հավելեց, որ անգամ այն փաստը, որ գյուղացին ստիպված է եղել լքել իր տունն ու բնակավայրը, արդեն իսկ խոսում է Ադրբեջանի կողմից ոչ միայն մարդու իրավունքների, այլև Ժնևյան կոնվենցիաների, օրինակ` խաղաղ բնակչության հանդեպ վերաբերմունքի մասին կոնվենցիայի կոպիտ ոտնահարումների մասին։
ՀՀ պաշտպանության նախարարության մամուլի ծառայությունը հինգշաբթի Ադրբեջանի պաշտպանության նախարարի հայտարարությունը` «Ի տարբերություն հակառակորդի՝ մենք չենք կռվում կանանց և երեխաների հետ», «ցինիկության գագաթնակետ» որակեց` հայտարարելով, որ հայկական կողմն ունի անհերքելի ապացույցներ, որոնք վկայում են ԼՂ Մարտակերտի շրջանի Թալիշ գյուղի խաղաղ բնակիչների նկատմամբ ադրբեջանցիների իրականացրած դաժան բռնությունների մասին։
