ԵՐԵՎԱՆ, 7 ապրիլի — Sputnik. Ռուսաստանը և Հայաստանը քննարկում են Հայաստանում որպես պահուստային արժույթ ռուբլին օգտագործելու հարցը, ասված է ՌԴ վարչապետ Դմիտրի Մեդվեդևի` Հայաստան կատարած այցի փաստաթղթերում։
«2013 թվականից աշխատանք է տարվում Ռուսաստանի և Հայաստանի Կենտրոնական բանկերի գործակցության խորացման ուղղությամբ»,- ասված է փաստաթղթերում։
Բացի այդ քննարկվում է Մոսկվայի բորսան և NASDAQ OMX Armenia բորսան որպես հայկական և ռուսական արժեթղթերի գնանշման այլընտրանքային հարթակ օգտագործելու հարցը։
ՌԴ վարչապետ Դմիտրի Մեդվեդևը ժամանել է Երևան, որտեղ կհանդիպի հանրապետության նախագահ Սերժ Սարգսյանի և կառավարության ղեկավար Հովիկ Աբրահամյանի հետ։
Հայաստանի ղեկավարության հետ բանակցությունների ընթացքում նախատեսվում է քննարկել երկկողմ օրակարգի մի շարք հարցեր` ներառյալ համագործակցությունը տնտեսության, էներգետիկայի, արդյունաբերության, տրանսպորտային ենթակառուցվածքի և այլ ոլորտներում։
Ապրիլի 8-ին Ռուսաստանի վարչապետը Բաքվում բանակցություններ կանցկացնի Ադրբեջանի նախագահ Իլհամ Ալիևի հետ։
