ԵՐԵՎԱՆ, 7 ապրիլի — Sputnik. Պետք է միջոցներ ձեռնարկել, որպեսզի Լեռնային Ղարաբաղում հակամարտությունը կրկին չսրվի, Բաքվում իրանցի և ադրբեջանցի գործընկերների հետ եռակողմ բանակցություններից հետո հայտարարել է ՌԴ արտգործնախարար Սերգեյ Լավրովը։
Լավրովը նշել է` Մոսկվան, Բաքուն և Թեհրանը փաստել են, որ ԼՂՀ-ում պահպանվում է հրադադարի ռեժիմը։
«Մենք հույս ունենք, որ կպահպանվեն և կիրագործվեն պայմանավորվածությունները` հաշվի առնելով այն, որ դեռևս 90-ականներին ընդունված համաձայնություններ կան», — ավելացրել է Լավրովը։
Նրա խոսքով` ներկայիս իրավիճակը պահանջում է շփման գծում վստահության միջոցներ ձեռնարկել։
«Հաշվի առնելով բռնության բռնկումը` մենք չպետք է մոռանանք հակամարտության քաղաքական կարգավորման տարբերակի մասին։ Ռուսաստանը, որպես համանախագահ, կշարունակի իր նախաձեռնությունները հակամարտությունը կարգավորելու համար», — նշել է Ռուսաստանի արտգործնախարարը։
Ապրիլի 1-ի լույս 2-ի գիշերը ղարաբաղա-ադրբեջանական հակամարտ զորքերի շփման գծի ողջ երկայնքով Ադրբեջանի կողմից սանձազերծված ագրեսիվ գործողություններն ուղղված էին ոչ միայն զորամասերի, այլև խաղաղ բնակիչների դեմ։ Ապրիլի 5-ին ղարաբաղյան հակամարտության կողմերը պայմանավորվել են դադարեցնել կրակը, սակայն Ադրբեջանը շարունակում է խախտել պայմանավորվածությունը և ապրիլի 6-ին ղարաբաղա-ադրբեջանական հակամարտ զորքերի շփման գծի հյուսիսարևելյան (Թալիշի) ուղղությամբ տեղակայված մարտական հենակետում հակառակորդի ականանետային կրակից մահացել է ՊԲ պայմանագրային զինծառայող, 1974թ.-ին ծնված Արմեն Գասպարյանը։
