ԵՐԵՎԱՆ, 7 ապրիլի – Sputnik. ԵԱՀԿ Մինսկի խմբի համանախագահների հետ երեկ կայացած հանդիպման ժամանակ Ադրբեջանի պաշտպանության նախարարը հայտարարել էր. «Ի տարբերություն հակառակորդի՝ մենք չենք կռվում կանանց և երեխաների հետ»,-հիշեցնում է ՀՀ պաշտպանության նախարարության մամուլի ծառայությունն ու հայտարարում, որ այն կարելի է համարել ցինիկության գագաթնակետ,հատկապես, որ հայկական կողմը ունի անհերքելի ապացույցներ այն մասին, թե ինչ դաժան բռնություններ են իրականացվել ԼՂ Մարտակերտի շրջանի Թալիշ գյուղի խաղաղ բնակիչների նկատմամբ։
Հայ լուսանկարիչը գյուղն ադրբեջանցիներից ազատագրելուց անմիջապես հետո լուսանկարահանել էր թալիշցի տարեց ամուսիններ Վալերա և Ռազմելա Խալափյաններին։ Նրանց իրենց տանը գնդակահարել, ապա վայրենի մոլուցքով նրանց ականջները կտրել էին տուն ներխուժած ադրբեջանցիները։
Այս փաստերը վկայակոչելով` ՀՀ ՊՆ-ն ԵԱՀԿ Մինսկի խմբի համանախագահներին կոչ է անում իրականության մասին դատել փաստերով։
