ԵՐԵՎԱՆ, 6 ապրիլի — Sputnik. Դավիթ Բաբայանը հայտնեց, որ իրենք սպասում են Մինսկի խմբի այցին Հայաստան, որը նախատեսվում է ապրիլի 7-ին, օրվա երկրորդ կեսին։ Նրա խոսքով` եվրոպացի բարեկամները վերջերս ավելի լավ են հասկանում պատերազմական դրությունը, քանի որ իրենք են դարձել դրա զոհը։
«Տեսնու՞մ եք՝ ինչ է կատարվել Փարիզում, ինչ եղավ Բրյուսելում։ Տա Աստված, որ այլևս որևէ տեղ չլինի ահաբեկչություն… Ողջամիտ մարդիկ հասկանում են՝ ինչ է կատարվում, ավելի լավ են սկսել հասկանալ մեր մոտեցումները, քանի որ առնչվում են ահաբեկչական պետության հետ»,- ասաց Բաբայանը:
Հարցին` արդյո՞ք հրադադարի մասին պայմանավորվածությունը ձեռք է բերվել նաև Ղարաբաղի համաձայնությամբ, Դավիթ Բաբայանը պատասխանեց.
«Այն, ինչ կա, շատ նման է բանակցային գործընթացին: Մենք գիտեք, որ ունենք խեղաթյուրված ձևաչափ: Բանակցային երեք կողմ կա, ավելի շուտ՝ երկուսն են՝ Ադրբեջանն ու Հայաստանը, իսկ Արցախը ներգրավված չէ։ Բայց Ղարաբաղը մասնակցում է բանակցություններին, այստեղ են գալիս Մինսկի խմբի համանախագահները, հանդիպում ենք, քննարկում ենք… Եթե վերցնենք զուտ ֆորմալ, իրավական մասը, համաձայնությունը ձեռք է բերվել Հայաստանի և Ադրբեջանի միջև, բայց քանի որ մենք ենք համաձայնության իրագործողը, բնական է, որ մենք էլ հանդիսանում ենք կողմերից մեկը»,-ասաց Բաբայանը։
Հարցին՝ Դաղստանում ռուսական բանակի կողմից անցկացվող զորավարժությունները տագնա՞պ էին Ադրբեջանի համար, Բաբայանը պատասխանեց, թե զորավարժություններն իրոք անցկացվում են, բայց, իր կարծիքով, դրանք չունեին ագրեսիվ բնույթ:
