ԵՐԵՎԱՆ, 6 ապրիլի — Sputnik. Ղարաբաղա-ադրբեջանական շփման գծում վիրավորված զինվորները պատրաստ են ապաքինվելուց հետո վերադառնալ շարք, անգամ մարտական գործողությունների հետևանքով ոտքից զրկված, անդամահատված զինվորը նման ցանկություն է հայտնել նախարար Սեյրան Օհանյանին։ Այս մասին այսօր ԱԺ-ում հայտնեց նախարարը։
Նախարարը նաև տեղեկացրեց, որ վիրավոր զինվորներն ու նրանց ընտանիքներն այսօր ՀՀ և ԼՂ կառավարությունների հոգածության տակ են, և ստանում են անհրաժեշտ աջակցությունը։ Ինչ վերաբերում է զոհերի ընտանիքներին, նախարարը նշեց, որ կառավարությունն իր վրա է վերցնում հուղարկավորության, գերեզմանատեղի հատկացման ու բարեկարգման ծախսերը։ Բացի այդ զոհերի հարազատներն օգտվում են ՀՀ օրենքներով ու կառավարության որոշումներով նախատեսված բոլոր օգնություններից և բարերարների տրամադրած աջակցությունից։
Իսկ ՀՀ վարչապետ Հովիկ Աբրահամյանը, պատասխանելով զոհված զինվորների ընտանիքների` բանկերին ունեցած վարկային պարտավորությունները մարելու մասին պատգամավոր Մարգարիտ Եսայանի առաջարկին, ասաց, որ կառավարությունը պատրաստ է քննարկել ու համապատասխան որոշում կայացնել։
Զոհված զինվորների` բանկերում ունեցած վարկերի զրոյացման հարցի վերաբերյալ էլ վարչապետն առայժմ հստակ պատասխան չուներ, բայց խոստացավ, որ այդ հարցի շուրջ քննարկումներ կլինեն կառավարությունում։
